अथांग वेब सिरिजच्या चित्रीकरणास लागेल ते सहकार्य राहील

सातारा : समाजातील वास्तवाचे प्रतिबिंब चित्रपट आणि दूरदर्शन, वेब सिरिअल्स मधुन होत असते. वास्तवतेबरोबरच पटकथेला साजेसे काही मनोरंजनात्मक समयोचित प्रसंग चित्तारले जावून, एक पूर्ण कथा पडदयावर झळकत असते. पडद्यावरील आणि पडद्यामागील कलाकारांच्या प्रामाणिक मेहेनतीवर चित्रकथा जनमानसावर गारुड करते. याच धर्तीवर असणारी अथांग ही वेब सिरिज निश्चितच सुपर डुपर ठरेल, याचे सातारा जिल्ह्यातील चित्रीकरणास लागेल ते सहकार्य आमचे राहील, असे उद्गार खासदार श्रीमंत छत्रपती उदयनराजे भोसले यांनी व्यक्त केले.
क्रिएटिव्ह विवे निर्मित, प्रसिध्द दिग्दर्शक जयवंत पवार, दिग्दर्शीका तेजस्विनी पंडीत, संतोष खेर यांची प्रमुख भूमिका असलेल्या अथांग या वेब सिरीजच्या कोरेगांव तालुक्यातील साप या गांवातील चित्रीकरणाचा शुभारंभ खासदार श्रीमंत छत्रपती उदयनराजे भोसले यांनी क्लॅप देवून केला. त्यावेळी ते बोलत होते.
यावेळी पुढे बोलताना खा. उदयनराजे भोसले यांनी सांगितले की, सातारा जिल्हा निसर्गाने वरदान दिलेला जिल्हा आहे. महाराष्ट्रात असा बहुदा एकमेव जिल्हा आहे. शुध्द वातावरण, नद्यांचे संगम, डोंगरमाथा, घाटरस्ता, कोरडे रान, अशी निसर्गाची सर्व रंगरूपे एकाच जिल्ह्यात पहायला मिळतात. निसर्गांनी उधळण केलेल्या या जिल्ह्यातील नागरिक देखिल परोपकारी आणि सहिष्णू आहेत. त्यामुळे या जिल्ह्यात रोजगार वाढीसाठी सिने चित्रपट आणि सिरिअल्सचे चित्रीकरण अधिकाधिक व्हावे याकरीता प्रोत्साहन आणि पाठींबा देण्याचा निर्णय सातारकरांनी घेतलेला आहे.
येथुन पुढील काळात बहुतांशी चित्रपटांचे चित्रीकरण सातारा जिल्ह्यातील ठिकठिकाणी होण्यासाठी लागणारी परवानगी सिंगल विंडो मधुन प्रदान करणे, चित्रीकरणासाठी मुलभुत सुविधा पुरवणे, निर्माते आणि प्रशासन, नागरीक यांच्यामध्ये समन्वयाकरीता, समन्वयक तयार करणे आदी उपाययोजना करण्यात आल्या आहेत, येत आहेत. अथांग वेब सिरीज या उपक्रमाची नांदी म्हणावी लागेल.
चित्रीकरणामुळे जवळजवळ सर्वच क्षेत्रात आर्थिक उलाढाल वाढत असते, उलाढाल वाढल्याने क्रियाशक्ती वाढते आणि एकंदरीत जीवनमान उंचावण्यास हातभार लागत असतो. यासाठीच निर्माते आणि सातारकर जिल्हावासिय यांचे सार्वत्रिक हिताकरीता इनोव्हेटीव्ह साताराच्या माध्यमातून योग्य दिशेने विविध प्रयत्न सुरु आहेत.
चित्रीकरण करायचे आहे, सातारला या, आपले स्वागत आहे. जी समस्या उद्भवेल ती आमच्यावर सोपवा. सातारकरांच्या हिताच्या प्रत्येक बाबीकरीता आम्ही जातीने अश्या समस्या सोडवण्याचा प्रयत्न करू. सातारच्या निसर्गाचा आणि नैसर्गिक रचनेचा लाभ घेत ऐतिहासिक, आध्यात्मिक, सामाजिक, सैनिक परंपरच्या पवित्र भुमीमध्ये बॉलीवूड आणि सॉलीवूड मधील निर्माता-दिग्दर्शकांनी सातारा जिल्ह्यात चित्रीकरण करावे, असे आवाहनही या प्रसंगी खासदार श्रीमंत छत्रपती उदयनराजे भोसले यांनी केले.
अथांग या नावातच अवखळता, धीरगंभीरता आहे. सामावून घेण्याची मानसिकता दडलेली आहे. त्यामुळे ही वेब सिरीज निश्चितच जनमानसावर गारुड करेल अश्या सदिच्छा आमच्यासह सर्व सातारकरांच्या आहेत, असेही खासदार श्रीमंत छत्रपती उदयनराजे भोसले यांनी यावेळी आवर्जुन सांगितले.
प्रारंभी, खासदार श्रीमंत छत्रपती उदयनराजे भोसले यांचे चित्रीकरण सेटवर अभिनेत्री तेजस्विनी पंडीत यांच्या हस्ते शाल, श्रीफळ आणि प्रतिमा देवून सर्वांच्या वतीने स्वागत केले. यावेळी रेणु येळगांवकर, पंकज चव्हाण, रोहीत सावंत, चित्रीकरणाचे व्यवस्थापक, सहकलाकार, बालकलाकार, सेटकर्मी, कलाप्रेमी, सापचे ग्रामस्थ मोठ्या संख्येने उपस्थित होते.