फलटण एसटी आगारातील ई-तिकीट सेवा कोलमडली? ऑनलाइन तिकीट बंद; प्रवाशांना रोख व्यवहाराची सक्ती

फलटण | प्रतिनिधी

डिजिटल व्यवहारांना शासनाकडून प्रोत्साहन दिले जात असताना फलटण एसटी आगारातील अनेक बसमध्ये ई-तिकीट (ETIM) मशीनची ऑनलाइन सेवा वारंवार बंद पडत असल्याने प्रवाशांना मोठ्या गैरसोयीचा सामना करावा लागत आहे. ऑनलाइन पेमेंट करून तिकीट घेण्याची सुविधा उपलब्ध नसल्याने अनेक प्रवाशांना रोख रक्कम देऊनच तिकीट घ्यावे लागत असल्याची धक्कादायक बाब समोर आली आहे.

एसटी महामंडळाच्या एका वाहकाने नाव जाहीर न करण्याच्या अटीवर सांगितले की, आगारातील काही तिकीट मशीनमध्ये सतत "एरर" येत असून ऑनलाइन नेटवर्क कार्यरत राहत नाही. त्यामुळे ऑनलाइन पेमेंट स्वीकारणे शक्य होत नसून रोख रक्कम घेऊनच तिकीट द्यावे लागत आहे. यामुळे प्रवासी आणि वाहक यांच्यात अनेकदा वादाचे प्रसंगही उद्भवत आहेत.

आज बहुतांश नागरिक यूपीआय, डेबिट कार्ड किंवा इतर डिजिटल माध्यमातून व्यवहार करत असताना एसटीची ऑनलाइन सेवा खंडित होणे ही गंभीर बाब मानली जात आहे. संबंधित तांत्रिक अडचणी तातडीने दूर करण्याऐवजी वरिष्ठ अधिकाऱ्यांकडून दुर्लक्ष होत असल्याचा आरोपही कर्मचाऱ्यांकडून होत आहे.

प्रवाशांच्या मते, डिजिटल महाराष्ट्राच्या युगात अशी परिस्थिती असणे हे एसटी प्रशासनाच्या कार्यक्षमतेवर प्रश्नचिन्ह निर्माण करणारे आहे. तिकीट मशीन त्वरित दुरुस्त करून ऑनलाइन सेवा सुरळीत करावी, तसेच आगारातील इतर प्रवासी सुविधांमध्येही सुधारणा करावी, अशी मागणी प्रवाशांनी केली आहे.

दरम्यान, या प्रकरणी फलटण एसटी आगार प्रशासनाची अधिकृत भूमिका जाणून घेण्याचा प्रयत्न झाला असता संपर्क होऊ शकला नाही.