नागपंचमीनिमित्त महिलांसाठी फलटण नगरपरिषदेचा खास मनोरंजनाचा कार्यक्रम

फलटण, दि. १६ :

श्रावण महिन्यातील महिलांचा जिव्हाळ्याचा सण असलेल्या नागपंचमीच्या निमित्ताने फलटण नगरपरिषदेच्या वतीने शहरातील महिलांसाठी खास मनोरंजनाच्या कार्यक्रमाचे आयोजन करण्यात आले आहे. सोमवार, दि. १७ ऑगस्ट २०२६ रोजी सायंकाळी ४ वाजता शनिनगर येथील नगरपरिषदेच्या बागेत हा कार्यक्रम होणार आहे.

नागपंचमीच्या दिवशी महिला एकत्र येऊन नागदेवतेची पूजा करण्याबरोबरच झिम्मा, फुगडी, झोका यांसारख्या पारंपरिक खेळांचा आनंद घेतात. महिलांच्या याच उत्साहाला अधिक रंगत देण्यासाठी नगरपरिषदेने या विशेष कार्यक्रमाचे आयोजन केले आहे.

महिलांना दैनंदिन धावपळीतून काही काळ विरंगुळा मिळावा, त्यांना एकत्र येऊन आनंदाचे क्षण अनुभवता यावेत तसेच पारंपरिक संस्कृती व सण-उत्सवांची परंपरा जपली जावी, हा या उपक्रमामागील उद्देश आहे. कार्यक्रमात विविध खेळ व मनोरंजनाच्या उपक्रमांचा महिलांना आनंद घेता येणार आहे.

फलटण शहरातील जास्तीत जास्त महिलांनी या कार्यक्रमास उपस्थित राहून नागपंचमीचा सण उत्साहात साजरा करावा, असे आवाहन नगराध्यक्ष समशेरसिंह नाईक निंबाळकर, मुख्याधिकारी निखिल जाधव तसेच फलटण नगरपरिषदेच्या सर्व नगरसेवकांच्या वतीने करण्यात आले आहे.