नवीन व्यावसायिक संकुलाला आद्य क्रांतिवीर राजे उमाजी नाईक यांचे नाव द्या

फलटण प्रतिनिधी : 

फलटण नगर परिषदेच्या इमारतीशेजारील जुनी बाग परिसरात नव्याने सुरू होत असलेल्या व्यावसायिक संकुलाला ‘आद्य क्रांतिवीर राजे उमाजी नाईक व्यावसायिक संकुल’ असे नाव देण्यात यावे, अशी मागणी समस्त फलटण तालुका रामोशी समाजाच्या वतीने नगर परिषदेला करण्यात आली आहे. यावेळी भाजपा डॉक्टर सेल फलटण शहराध्यक्ष डॉ. सुभाष गुळवे, आद्य क्रांतिवीर राजे उमाजी नाईक सार्वजनिक गणेशोत्सव मंडळाचे अध्यक्ष रामभाऊ मदने सामाजिक कार्यकर्ते रुपेश मदने आदि उपस्थित होते. याबाबत नगराध्यक्ष समशेरसिंह नाईक निंबाळकर व मुख्याधिकारी यांच्याकडे निवेदनाद्वारे मागणी करण्यात आली आहे.

आद्य क्रांतिवीर राजे उमाजी नाईक यांनी ब्रिटिश सत्तेविरुद्ध सशस्त्र संघर्ष उभारून अन्याय आणि जुलमी राजवटीविरोधात लढा दिला. स्वाभिमान, शौर्य, त्याग आणि देशभक्तीचे प्रतीक म्हणून त्यांचे कार्य आजही समाजासाठी प्रेरणादायी आहे. सर्वसामान्यांच्या हक्कांसाठी त्यांनी केलेला संघर्ष महाराष्ट्राच्या इतिहासातील महत्त्वाचा अध्याय मानला जातो.

फलटण तालुक्याचा सामाजिक व ऐतिहासिक वारसा लक्षात घेता, नव्याने सुरू होणाऱ्या व्यावसायिक संकुलाला राजे उमाजी नाईक यांचे नाव देणे ही त्यांच्या शौर्याला आणि त्यागाला योग्य आदरांजली ठरेल, असे रामोशी समाजाच्या वतीने निवेदनात नमूद करण्यात आले आहे.

तसेच राजे उमाजी नाईक यांच्या कार्याची माहिती आणि इतिहास पुढील पिढ्यांपर्यंत पोहोचण्यास या नामकरणामुळे मदत होईल. त्यामुळे नगर परिषदेने याबाबत सकारात्मक निर्णय घेऊन ‘आद्य क्रांतिवीर राजे उमाजी नाईक व्यावसायिक संकुल’ असे नामकरण करावे, अशी मागणी समाजाच्या वतीने करण्यात आली आहे.