बंदी असलेल्या चायनीज मांजामुळे फलटणमध्ये नागरिक गंभीर जखमी; प्रशासनाच्या दुर्लक्षावर संताप

फलटण प्रतिनिधी :

फलटण शहरात बंदी असलेल्या चायनीज मांजामुळे आणखी एक गंभीर अपघात घडला असून, फलटण येथील शिवाजी मुगुटराव बुधावले हे या घटनेत गंभीर जखमी झाले आहेत. डेक्कन चौक परिसरात जात असताना त्यांच्या गळ्यावर चायनीज मांजा लागल्याने त्यांना मोठी दुखापत झाली.

घटनेनंतर परिसरातील काही सतर्क युवकांनी तातडीने मदत करत बुधावले यांना फलटणमधील एका रुग्णालयात दाखल केले. तेथे त्यांच्यावर प्राथमिक उपचार करण्यात आले. नागरिकांच्या तत्परतेमुळे मोठा अनर्थ टळल्याचे बोलले जात आहे.

विशेष म्हणजे, चायनीज मांजाच्या विक्री व वापरावर शासनाने बंदी घातलेली असतानाही फलटण शहरात काही ठिकाणी हा जीवघेणा मांजा सर्रासपणे विकला जात असल्याची तक्रार नागरिकांकडून वारंवार करण्यात येत आहे. मात्र, याकडे संबंधित यंत्रणा आणि पोलिस प्रशासनाचे पुरेसे लक्ष नसल्याचा आरोप नागरिकांनी केला आहे.

चायनीज मांजामुळे दरवर्षी दुचाकीस्वार, पादचारी तसेच पक्ष्यांनाही गंभीर इजा होत असल्याच्या घटना समोर येत असतानाही अशा प्रतिबंधित मांजाची विक्री रोखण्यासाठी प्रभावी कारवाई होत नसल्याने नागरिकांमध्ये तीव्र नाराजी व्यक्त होत आहे.

या घटनेनंतर फलटण शहरातील नागरिकांनी संतप्त प्रतिक्रिया देत, "एखाद्या निष्पाप व्यक्तीचा जीव गेल्यानंतरच पोलिस प्रशासन जागे होणार का?" असा सवाल उपस्थित केला आहे. तसेच शहरात सुरू असलेल्या बंदी असलेल्या चायनीज मांजाच्या विक्रीवर तातडीने धाडसत्र राबवून दोषींवर कठोर कारवाई करण्याची मागणी करण्यात येत आहे.

दरम्यान, अशा जीवघेण्या प्रकारांना आळा घालण्यासाठी पोलिस प्रशासन, स्थानिक स्वराज्य संस्था आणि संबंधित विभागांनी संयुक्त मोहीम राबवून बंदी असलेल्या चायनीज मांजाची विक्री व वापर पूर्णपणे बंद करावा, अशी मागणी नागरिकांकडून जोर धरत आहे.