महिला आरक्षित पदांच्या निवडीकरिता नॉन – क्रिमिलेअर प्रमाणपत्राची अट रद्द

सातारा, दि.  – महिला व बाल विकास विभागाकडील शासन निर्णयानुसार खुल्या प्रवर्गातील महिलांकरिता आरक्षित असलेल्या पदांवरील निवडीकरिता खुल्या तसेच सर्व मागास प्रवर्गातील महिलांना नॉन क्रिमीलेअर प्रमाणपत्र सादर करण्याची अट रद्द करण्यात आली आहे. या तरतुदी पूर्वलक्षी प्रभावाने दिनांक 29 सप्टेंबर 2022 नंतरच्या पदभरतीसाठी अमलात येतील.

 विभागीय कृषि सहसंचालक, कोल्हापूर कार्यालयाच्या आस्थापनेवरील गट – क संवर्गातील वरिष्ठ लिपीक व सहाय्यक अधिक्षक पद भरतीसाठीची जाहिरात प्रसिद्ध करण्यात आली आहे. जुन्या निकषानुसार नॉन क्रिमीलेअर प्रमाणपत्र नसलेल्या महिला उमेदवारांना अर्ज करता आलेले नाहीत. त्यामुळे सरळसेवा भरतीसाठी अर्ज सादर करण्यासाठी 10 दिवसांची मुदत देण्यात आली आहे. त्याअनुषंगाने दि. 13 जुलै ते 22 जुलै या कालावधीत www.krishi.maharashtra.gov.in या संकेतस्थळावर ऑनलाईन अर्ज प्रणाली खुली करण्यात येणार आहे. जे उमेदवार यापूर्वी अर्ज सादर करू शकले नाहीत ते उमेदवार अर्ज सादर करू शकतील. तथापि जाहिरातीमधील वय, शैक्षणिक पात्रता, अनुभव व परीक्षा शुल्क इतर सर्व संदर्भातील अटी व शर्ती कायम राहतील असे बसवराज बिराजदार, विभागीय कृषि सह संचालक, कोल्हापूर हे कळवतात.