जिल्हा बँकेच्या निकालाने राजे गटाला आत्मपरीक्षण करण्याची वेळ आणली : अशोकराव जाधव

फलटण : सातारा जिल्हा मध्यवर्ती सहकारी बँकेच्या निवडणुकीत खासदार गटाचे समशेरसिंह नाईक निंबाळकर यांना मिळालेल्या ६० मतांवरून फलटणच्या राजकीय वर्तुळात आरोप-प्रत्यारोपांना सुरुवात झाली आहे. राजे गटाने जिल्हा बँकेतील विजय हा आपला पराभव आहे, हे मान्य करावे. आकड्यांचे गणित मांडून पराभव लपवण्याचा केविलवाणा प्रयत्न करू नये, असा जोरदार टोला नगरसेवक अशोकराव जाधव यांनी लगावला आहे.

माजी खासदार रणजितसिंह नाईक निंबाळकर यांच्याकडे सुरुवातीला केवळ २९ मते होती. मात्र, या निवडणुकीत खासदार गटाचे उमेदवार समशेरसिंह नाईक निंबाळकर यांना ६० मते मिळाली. म्हणजेच मतांची संख्या दुपटीपेक्षा अधिक झाली आहे. त्यामुळे नेमकी कोणाची मते फुटली, हे समजण्याइतकी फलटण तालुक्यातील जनता सुज्ञ आहे, असे जाधव यांनी म्हटले आहे.

मागील जिल्हा बँकेच्या निवडणुकीत श्रीमंत रामराजे नाईक निंबाळकर यांच्या विरोधात खासदार गटाचे तुकाराम शिंदे यांनी निवडणूक लढवली होती. त्यावेळी तुकाराम शिंदे यांना अवघी ९ मते मिळाली होती. त्या काळात बहुतांश सोसायट्या राजे गटाच्या ताब्यात होत्या. मात्र, आज खासदार गटाचे समशेरसिंह नाईक निंबाळकर यांना ६० मते मिळाली आहेत. मग ही मते नेमकी कोणाची फुटली, याचे आत्मपरीक्षण राजे गटाने करण्याची गरज आहे, असेही त्यांनी स्पष्ट केले.

राजे गटाला मिळालेला विजय जिव्हारी लागला असून, आकड्यांचे गणित मांडून आपला पराभव लपवण्याचा प्रयत्न केला जात असल्याची टीका करत अशा भूमिकेची आपल्याला कीव येते, असेही अशोकराव जाधव म्हणाले.

यापुढील काळात फलटण तालुक्यातील ग्रामपंचायत आणि विविध सोसायट्यांच्या निवडणुका खासदार गट एकदिलाने लढणार आहे. फलटण तालुका माजी खासदार रणजितसिंह नाईक निंबाळकर यांच्या पाठीशी खंबीरपणे उभा आहे, हेच जिल्हा बँकेच्या निवडणुकीतून सिद्ध झाले आहे, असा दावाही नगरसेवक अशोकराव जाधव यांनी केला.