सराईत दुचाकी चोरट्यास पाठलाग करून केले जेरबंद 

सातारा : आदर्की, फाटा येथे एलसबीच्या पथकाने भरधाव वेगात निघालेल्या दुचाकी चोरट्याचा पाठलाग करून त्यास शिताफीने जेरबंद केले. राष्ट्रपाल साहेबराव अंभोरे वय 38, रा. वाघाळा, ता. पाथरी, जि. परभणी असे त्याचे नाव आहे. 

याबाबत माहिती अशी, सातारा ते आदर्की फाटा मार्गे एकजण चोरी केलेली स्लेंडर प्लस मोटार सायकल घेवून सातारा जिल्ह्याच्या हद्दीबाहेरील पळून निघाल्याची माहिती स्थानिक गुन्हे शाखेला मिळाली. यानंतर स्थानिक गुन्हे शाखेचे पथकाने जिल्ह्यातून बाहेर जाण्याआधीच ताब्यात घेण्यासाठी तात्काळ हालचाली करत आदर्की फाटा येथे सापळा लावला. यावेळी मिळालेल्या वर्णनातील मोटार सायकल घेवून आदर्की फाटा येथून फलटणचे दिशेने एकजण भरधाव वेगात जात असताना दिसून आला. पोलीस पथकाने वाहनातून त्याचा पाठलाग सुरू केला व त्यास थांबण्याचा इशारा केला. परंतु, संशयिताने न थांबता पळून जाण्याचा प्रयत्न केला. पोलीस पथकाने मोठ्या शिताफीने त्यास ताब्यात घेतले. त्याच्याजवळ मोटार सायकलबाबत सखोल चौकशी केली असता. त्याने मोटार सायकल सातारा जिल्हा मध्यवर्ती बँक शाखा कोडोली ता.जि.सातारा समोरील पार्किंगमधून चोरी केल्याचे सांगितले. त्याानुसार खातरजमा केली असता सातारा शहर पोलीस ठाण्यात याबाबत गुन्हा दाखल करण्यात आलेला आहे. पोलिसांनी 20 हजार रुपये किमतीची मोटार सायकल हस्तगत केली असून संशयीत व दुचाकी पुढील कारवाई सातारा शहर पोलीस ठाण्याच्या ताब्यात दिली आहे.

ही कारवाई पोलीस अधीक्षक अजयकुमार बन्सल, अप्पर पोलीस अधीक्षक धीरज पाटील, स्थानिक गुन्हे शाखेचे किशोर धुमाळ यांच्या मार्गदर्शनाखाली सहाय्यक पोलीस निरीक्षक, रमेश गर्जे, सहाय्यक पोलीस निरीक्षक आनंदसिंग साबळे, सफो जोतीराम बर्गे, पोहवा सुधीर बनकर, संतोष सपकाळ, मोहन नाचण, पोना साविर मुल्ला, राजकूमार ननावरे, अर्जुन शिरतोडे, अमित सपकाळ, अजित कर्णे, पोशि प्रविण पवार, केतन शिंदे यांनी केली. 

पोलीस अधीक्षकांकडून पथकाचे अभिनंदन 
दुचाकी चोर जिल्हाबाहेर पळून जात असल्याची माहिती मिळताच पोलिस पथकाने त्वरित हालचाल केली. यामुळे दुचाकी चोरीचा गुन्हा 24 तासात उघडकीस आणता आला. या उल्लेखनीय कामगिरीबाबत पोलीस अधीक्षक अजयकुमार बन्सल, अप्पर पोलीस अधीक्षक धीरज पाटील यांनी कारवाईत सहभागी झालेल्या सर्वांचे अभिनंदन केले आहे.