शेतातील झोपडीत वीज कोसळून दोघे ठार

खंडाळा : कवठे, ता. खंडाळा येथे झोपडीवर वीज कोसळून जेवायला बसलेल्या दोघांचा जागीच मृत्यू झाला. शशिकांत दादासाहेब लिमन (वय 35, रा. झगलवाडी, ता. खंडाळा) व खाशाबा भाऊसाहेब जाधव (वय 60, रा. कवठे, ता. खंडाळा) अशी त्यांची नावे आहेत. या दुर्दैवी घटनेमुळे कवठे व झगलवाडी गावात हळहळ व्यक्त होत आहे.

याबाबतची माहिती अशी, खंडाळा तालुक्यातील कवठे गावच्या हद्दीमध्ये वेताळाचा माळ नावाचे शिवारामध्ये झगलवाडी, ता. खंडाळा येथील शशिकांत लिमन यांच्या मालकीची शेतजमीन आहे. ही जमीन सध्या वाट्याने कवठे येथील खाशाबा जाधव यांनी कसायला घेतली आहे. रविवारी 11 वाजण्याच्या दरम्यान शशिकांत लिमन, खाशाबा जाधव हे भुईमूगाच्या पिकाला पाणी देण्याचे काम करीत होते. यावेळी पाणी देण्याचे काम झाल्यानंतर दुपारी 1 वाजता शेतामधील खोपीमध्ये शशिकांत लिमन व खाशाबा जाधव हे जेवणाकरीता बसले होते.

यावेळी अचानकपणे वादळी वार्‍यासह पाऊस सुरू झाला. यावेळी 1.30 वाजण्याच्या दरम्यान अचानकपणे विजांचा लोळ जेवणाकरिता बसलेल्या शशिकांत लिमन व खाशाबा जाधव यांच्या खोपीवर पडला. यावेळी झोपडीकडे खाशाबा जाधव यांची पत्नी, मुलगा व प्रशांत जाधव त्यांची पत्नी, आईने धाव घेतली. तथापि, शशिकांत लिमन व खाशाबा जाधव यांचा झोपडीमध्येच निपचित पडले होते.

त्यानंतर शशिकांत लिमन व खाशाबा जाधव यांना शिरवळ येथील खाजगी रुग्णालयामध्ये आणले असता डॉक्टरांनी तपासून मृत घोषित केले. या घटनेमुळे झगलवाडी सह कवठे गावावर शोककळा पसरली आहे. याबाबतची फिर्याद विठ्ठल तुकाराम भोसले यांनी शिरवळ पोलीस स्टेशनला दिली आहे. या घटनेचा अधिक तपास सहाय्यक पोलीस उपनिरीक्षक पांडुरंग हजारे, पोलीस हवालदार विनोद पवार हे करत आहे.