इंधन भरून निघालेल्या टँकरला अपघातामुळे आग 

खंडाळा : मुंबईहून कोल्हापूर याठिकाणी 24 हजार लिटर पेट्रोल-डिझेल भरून निघालेल्या टँकरचे पाठीमागील टायर फुटून लागलेल्या आगीमध्ये टँकरचे साधारणपणे दिड लाख रुपयांचे नुकसान झाले आहे. सुदैवाने यामध्ये कोणतीही जिवीतहानी झाली नाही. ही घटना सोमवार दि.19 एप्रिल रोजी रात्री 11 वाजण्याच्या दरम्यान घडली. यावेळी टँकरला लागलेली आग आटोक्यात आणल्याने शिरवळकरांनी सुटकेचा निश्‍वास सोडला.

याबाबतची शिरवळ पोलीसांनी दिलेली माहिती अशी कि, मुंबई येथील रिलायन्स कंपनीच्या डेपोमधून गडहिंग्लज, कोल्हापूर याठिकाणी असणार्‍या पेट्रोल पंपावर चालक शामसुंदर प्रभू कोल्हे (वय 38 रा. लोणी काळभोर जि. पुणे) व दुसरा चालक विलास भगवान मोरे (वय 33, रा. चांदणी, जि. बीड) हे टँकर (क्र. एमएच 12-12-आरएन 6778) 14 हजार लिटर डिझेल तर 10 हजार लिटर पेट्रोल भरलेले घेऊन निघाले होते.

यावेळी शिरवळ, ता. खंडाळा हद्दीमधील फुलमळ्यालगत एका हॉटेललगत आला असता क्लिनर बाजूकडील पाठीमागे असणारा टायर फुटला. यावेळी चालक शामसुंदर कोल्हे याने टँकर साधारणपणे 75 मीटरपर्यंत ब्रेक दाबत टॅकर थांबवला असता फुटलेल्या टायरला अचानकपणे आग लागली.

यावेळी टँकरमधील आग विझविणार्‍या यंत्राने चालक शामसुंदर कोल्हे याने आग आटोक्यात आणण्याचा प्रयत्न केला. परंतु, आगीने रौद्ररुप धारण करत शेजारील टँकरचे सहा टायरही पेटले. त्यामुळे चालक शामसुंदर कोल्हे याने तात्काळ शिरवळ पोलीस स्टेशनला धाव घेत याची माहिती पोलिसांना दिली. शिरवळ पोलीस स्टेशनचे पोलीस निरीक्षक उमेश हजारे हे पोलीस उपनिरीक्षक सागर अरगडे, सहाय्यक पोलीस उपनिरीक्षक पांडुरंग हजारे, राजू अहिरराव, पोलीस हवालदार आप्पासाहेब कोलवडकर, शिवराज जाधव, प्रशांत वाघमारे, संतोष ननावरे व होमगार्ड यांच्यासह पोलीस कर्मचार्‍यांसहित तर सारोळा महामार्ग पोलीस मदत केंद्राचे सहाय्यक पोलीस निरीक्षक प्रवीण रणदिवे यांनी घटनास्थळी पोलीस कर्मचार्‍यांसमवेत धाव घेत महामार्गावरील वाहतूक तत्काळ घटनास्थळापासून वळवली.

यावेळी भोर नगरपरिषदचे अग्निशमन दलाचे जवान हृषीकेश शेटे, आबा साबळे, अमीर अत्तार, रोहित देशमाने तसेच केसुर्डी एमआयडीसीतील एशियन पेन्ट्सच्या अग्निशमन दलाचे जवानांनी व एचआर व्यवस्थापक मनोज क्षीरसागर यांनी व वाई अग्निशमन दलाच्या जवानांनी तसेच शिरवळ पोलीस स्टेशनचे पोलीस निरीक्षक उमेश हजारे यांनी पोलीस उपनिरीक्षक सागर अरगडे, सहाय्यक पोलीस उपनिरीक्षक पांडुरंग हजारे, राजू अहिरराव, पोलीस हवालदार आप्पासाहेब कोलवडकर, शिवराज जाधव, प्रशांत वाघमारे, संतोष ननावरे, होमगार्ड यांच्यासह शिरवळ पोलीस कर्मचार्‍यांच्या सहकार्याने व सारोळा महामार्ग मदत केंद्राचे सहाय्यक पोलीस निरीक्षक प्रविण रणदिवे व महामार्ग पोलीस कर्मचार्‍यांच्या सहकार्याने टँकरला लागलेली आग संपूर्णपणे आटोक्यात आणण्यात तब्बल तीन तासांच्या अथक प्रयत्नानंतर मध्यरात्री 1 वाजण्याच्या दरम्यान यश मिळविले.

या घटनेची फिर्याद चालक शामसुंदर कोल्हे यांनी शिरवळ पोलीस स्टेशनला दिली असून अधिक तपास सहाय्यक पोलीस उपनिरीक्षक पांडुरंग हजारे करत आहे.