फलटणच्या रस्त्यांनी घेतला मोकळा श्वास : रस्त्यावरील अतिक्रमणांवर पालिकेचा हातोडा

फलटण :- गेल्या अनेक वर्षापासून फलटण शहरातील विविध रस्त्यांवर अतिक्रमण बोकाळले होते. मात्र आज फलटण नगरपालिकेच्या प्रशासनाने रस्त्यांवरील अतिक्रमणे काढण्यास सुरुवात केल्याने फलटणचा रस्त्यांनी मोकळा श्वास घेतला आहे. वाहतुकीस अडथळे ठरणारे हे अतिक्रमणे नगरपालिका प्रशासनाने मोठ्या पोलीस बंदोबस्तासह काढण्यास सुरुवात केली आहे. 

रस्त्यावरील अतिक्रमणे निघत असल्याने फलटणकराने पालिकेला धन्यवाद दिले आहेत. अनेक व्यापारांनी चक्क रस्त्याच्या मधोमध जाहिरातींचे फलक लावून वाहतुकीस अडथळा निर्माण केला होता. तर अनेक व्यावसायिक संकुलासमोरील पार्किंगमध्येच जाहिरातींचे बॅनर लावल्याने पार्किंग व्यवस्था अस्तव्यस्त झाली होती. आजच्या या कारवाईने शहरातील भारतरत्न डॉ. बाबासाहेब आंबेडकर चौक, जुना डी.एड.चौक, यासह विविध भागातील रस्त्यावरील अतिक्रमणे काढल्याने वाहतूक व्यवस्था सुरळीत होण्याची शक्यता आहे.

फलटण तहसीलदार तथा कार्यकारी दंडाधिकारी डॉ अभिजीत जाधव यांचे अध्यक्षतेखाली दिनांक २८/११/२०२४ रोजी पार पडलेल्या बैठकीत महाराष्ट्र नगर परिषद, नगर पंचायती व औद्योगिक नगरी अधिनियम १९६५ मधील कलम १७९ मधील नमूद तरतूदी

नुसार कारवाई करण्याचे निर्देश देण्यात आले होते. त्यानूसार फलटण शहरातील सर्व मुख्य चौकामध्ये, मुख्य रस्त्यावर तसेच अंतर्गत रस्त्यांवर दिवसेंदिवस वाहतुकीची समस्या उद्भवण्याचे प्रमाण वाढले होते. फलटण शहराच्या आजूबाजूच्या परिसरामध्ये साखर कारखाने तसेच लहान-मोठे उद्योग मोठ्या प्रमाणावर असल्यामुळे ट्रक, ऊसाची वाहतूक करणारे ट्रॅक्टर तसेच इतर अवजड वाहनाची वाहतूक मोठ्या प्रमाणावर असल्यामुळे वाहतुकीची समस्या निर्माण होत होती.यापूर्वी पार पडलेल्या बैठकीमध्ये फलटण शहरातील वाहतूक समस्येची कोंडी कमी करण्यासाठी मुख्याधिकारी, फलटण नगरपरिषद व पोलीस निरीक्षक, फलटण शहर पोलीस स्टेशन यांना संयुक्त पणे उपायोजना करण्याचा निर्णय झाला होता.

त्यानूसार शहरातील सार्वजनिक रस्त्याच्या पृष्ठभागावरील प्रक्षपणे, अडथळे व अतिक्रमणे झाली असल्याने मुख्याधिकारी यांचे लेखी परवानगीशिवाय कोणत्याही व्यक्तीने कोणत्याही सार्वजनिक रस्त्यावर केलेले कोणतेही प्रक्षेपण, अतिक्रमण किवा अडथळा कोणतीही नोटीस न देता काढून टाकण्याचा अधिकार मुख्याधिकारी यांना असल्याने मुख्याधिकारी निखिल मोरे यांनी दोन पथकांची नेमणूक करत अतिक्रमण विरोधी कारवाई करता आदेश जारी केली होते. आज सकाळी या अतिक्रमण हटवण्याच्या मोहिमेस सुरुवात झाली आहे.

किरकोळ बाचाबाचीचे प्रकार 

 शहरातील व्यावसायिक संकुलासमोरील अतिक्रमण व्यावसायिक जाहिरातीचे फलक व अनधिकृत हातगाडी काढत असताना अतिक्रमण धारक अनेक व्यवसायिकांनी अतिक्रमण काढण्यास विरोध दर्शविल्याने किरकोळ बाचाबाचीचे प्रकार झाले मात्र नगरपालिका आपल्या निर्णयावर ठाम राहील्याने व पोलिसांच्या मदतीने किरकोळ वाद मिटवण्यात आले. 

 शहरातील धनदांडग्यांवर कारवाई होणार का?

 फलटण नगरपालिका प्रशासनाने आज शहरातील रस्त्यांवर अतिक्रमे काढण्यास सुरुवात केल्याने नागरिकांनी आनंद व्यक्त करत असतानाच, फलटण शहरातील अनेक अतिक्रमणे ही धनदांडग्यांची आहेत त्यांच्यावर नगरपालिका प्रशासन कारवाई करणार का अशी चर्चा सध्या फलटण शहरात सुरू आहे. 

 तक्रारी असलेल्या सर्व अतिक्रमणांवर कारवाई होणार - मुख्याधिकारी निखिल मोरे 

 सध्या फलटण शहरातील रस्त्यांवरील अतिक्रमणे काढण्यात येणार आहेत. त्यानंतर तक्रारी असणारी अतिक्रमणे ही काढली जाणार असल्याची माहिती फलटण नगर परिषदेचे मुख्याधिकारी निखिल मोरे यांनी सांगितले.