ताथवडा घाटात दरड कोसळून अपघाताची शक्यता

फलटण प्रतिनिधी : 

फलटण -पुसेगाव मार्गांवरील ताथवडा घाटात पावसाळ्यात दरड कोसळून अपघात होत असतात. घाटातील डोंगरही अनेक ठिकाणी कुमकुवत झाले असून तेथेही दरड कोसळण्याची भिती व्यक्त केली जात आहे. तरी संबंधित प्रशासनाने वेळीच दखल घेत घाटातील रस्त्यावर पडलेले दगड ताबडतोब उचलून अपघात होणार नाहीत यासाठी योग्य ती कारवाई करण्याची प्रवाशांची मागणी आहे.  

पावसाळ्यामध्ये ताथवडा घाटात निसर्गाचे नयनरम्य दृश्य पाहण्यासाठी प्रवाशी व पर्यटक थांबत असतात. पण या भागात दरड कोसळण्याच्या भीतीने पर्यटक आणि या मार्गावरून वाहतूक करणारे प्रवासी देखील जीव मुठीत घेऊन ये-जा करत असतात. या भागात काही ठिकाणी नेट फेंसिंग करण्याची गरज आहे. हा भाग दरडप्रवण क्षेत्र असून दरवर्षी या ठिकाणी छोटे- मोठे अपघात होत असतात. त्यामुळे वाहनचालक जीव मुठीत घेऊन वाहने चालवित असतात. फार जोराचा पाऊस नसताना दरड कोसळत आहेत. पावसाने जोर धरला तर काय होईल अशी भीती आता नागरीक आणि वाहन चालकांना सतावत आहे.

फलटण - सातारा मार्गांवरील रस्त्याचे काम सुरु असल्याने फलटणहून साताऱ्याला जाण्यासाठी पुसेगाव मार्गे सातारा या पर्यायी मार्गाचा अनेक वाहन चालक वापर करीत आहेत. तर कराडला जाण्यासाठी पुसेगाव हा मार्ग निवडला जातो त्यामुळे या मार्गांवरून जाणारी वाहतूक वाढली आहे. त्यामुळे प्रशासनाने त्वरित दखल घेत ताथवडा घाटातील योग्य ती कारवाई करावी.