तेल टँकरचा स्फोट : 91 जणांचा मृत्यू

फ्रीटाऊन : आफ्रिकन देश सिएरा लिओनची राजधानी फ्रीटाऊनमध्ये तेलाच्या टँकरचा स्फोट झाला. या अपघातात 91 जणांचा मृत्यू झाला असून, मोठ्या प्रमाणात लोक जखमी झाले आहेत.
40 फूट लांब तेलाच्या टँकरने विरुद्ध बाजूने येणाऱ्या दुसऱ्या वाहनाला धडक दिल्याने ही घटना घडली. या धडकेत मोठा स्फोट झाल्याने संपूर्ण परिसरात हाहाकार उडाला. शहरातील वेलिंग्टन परिसरातील सुपरमार्केटबाहेर गर्दी असतानाच हा स्फोट झाला. घटनेची माहिती मिळताच अग्निशमन दलाच्या अनेक तुकड्या घटनास्थळी पोहोचल्या आणि त्यांनी मदत आणि बचावकार्य सुरू केले. जखमींना रुग्णालयात दाखल करण्यात आले असून मृतांचा आकडा वाढण्याची भीती व्यक्त केली जात आहे.
महापौरांनीही व्हिडीओ फुटेज पाहून या घटनेला ‘भयानक’ म्हटले आहे. तसेच किती नुकसान झाले हे सांगणे कठीण असल्याचेही ते म्हणाले. स्थानिक प्रसारमाध्यमांनी वैद्यकीय अधिकाऱ्यांनी मृतांची संख्या 91 असल्याची माहिती दिली आहे.