"गॅलेक्सी" ला बँको ब्लू रिबन पुरस्कार जाहीर.

सातारा (एकता दर्शन) : सहकार क्षेत्रात आपली वेगळी ओळख निर्माण करणाऱ्या गॅलेक्सीने संस्थेच्या स्थापनेपासून ३ वर्षात जास्तीत जास्त सुरक्षित ठेवी व जास्तीत जास्त सुरक्षित कर्जवाटप या निकषावर मा. सचिन यादव यांच्या नेतृत्वात कार्यरत गॅलेक्सी को-ऑपरेटिव्ह क्रेडिट सोसायटी लि. फलटण या संस्थेला यावर्षीचा मानाचा "बँको ब्लू रिबन पुरस्कार" जाहीर झाला. सहकार क्षेत्रातील संस्थांच्या कार्यास प्रोत्साहन मिळावे या हेतूने हा पुरस्कार दिला जातो. दि. १५ मार्च २०२२ रोजी मान्यवरांच्या हस्ते "बँको ब्लू रिबन" पुरस्कार प्रदान केला जाणार आहे.

मा. सचिन यादव यांच्या नेतृत्वात गॅलेक्सी को-ऑप. क्रेडिट सोसायटीची यशस्वी वाटचाल सुरु असताना त्यांच्या कामाची दाखल घेऊन त्यांना पुरस्कार जाहीर झाल्यामुळे त्या संस्थेच्या कार्याचे राज्यातील सहकार क्षेत्रात कौतुक होत आहे. ३ वर्षात ग्राहकांच्या ठेवी सुरक्षित करणे, बँकेतील ग्राहकांच्या सोने ऐवजांचा विमा करणे, सर्व सभासदांचा प्रत्येकी १ लाख रुपयांचा विमा करणे, जास्तीतजास्त मॉरगेज व सोनेतारण कर्जवाटप करून ग्राहकांच्या ठेवी सुरक्षित करणे, ग्राहकांना घरपोच सेवा देणे, ज्येष्ठ नागरिक यांच्यासोबत विधवा महिला, देशसेवा करणारे सैनिक यांनाही ठेवींवर अधिक व्याजदर, ग्राहकांना फ्री ऑनलाईन सेवा देणे, फ्री मोबाईल अँप सेवा प्रदान करणे. आदी बँकिंग क्षेत्रातील असणाऱ्या मोठ्या सुविधा पतसंस्थेच्या ग्राहकांना मोफत दिल्याने पुरस्कार जाहीर करताना त्याची दखल घेण्यात आली.

गॅलेक्सीने अल्पावधीतच ग्राहकांच्या संख्येचा १० हजारांचा टप्पा पार केला आहे. संस्थेचे अद्यावत व स्वतंत्र प्रमुख कार्यालय सुरु केले असून संस्थेच्या फलटण तालुक्यात ३ शाखांचा विस्तार केला आहे. रोजगारनिर्मितीसह सध्या संस्थेत २५ कर्मचारी कार्यरत आहेत.

आपण प्रामाणिक काम करत असल्यामुळे केलेल्या कामाचा सन्मान "ब्लु रिबन पुरस्काराच्या" माध्यमातून होत आहे. याचे समाधान व्यक्त करत आणखी जबाबदारी वाढल्याचे मा. श्री. सचिन यादव यांनी नमूद केले. तसेच भविष्यात ग्राहकांसाठी नव-नवीन योजना निर्माण करून संस्थेचा नावलौकिक राज्यात वाढण्यासाठी प्रयत्न करणार असल्याचे सांगितले.