बुलेटच्या फटफट आवाजावर व बिना नंबर प्लेट वाहनांवर कारवाई सुरू - एका नगरसेवकाकडून काही बुलेट तसेच बिना नंबर प्लेटची वाहने सोडण्याबाबत पोलिस अधिकाऱ्यांना फोन
टीम : धैर्य टाईम्स
दबाव टाकण्याचा प्रयत्न? दरम्यान, कारवाईदरम्यान एका नगरसेवकाने काही बुलेट तसेच बिना नंबर प्लेटची वाहने सोडण्याबाबत पोलिस अधिकाऱ्यांना फोन केल्याची चर्चा शहरात सुरू आहे. संबंधित व्यक्ती स्वतःला मोठा नेता असल्याचे भासवत कारवाई थांबविण्याचा प्रयत्न करत असल्याचे बोलले जात आहे. मात्र, कायद्याच्या अंमलबजावणीत कोणताही हस्तक्षेप सहन केला जाणार नाही, अशी भूमिका नागरिक व पत्रकारांनी घेतली असून अशा प्रकारांबाबत सत्य बाहेर आणण्याचा इशाराही देण्यात आला आहे.
फलटण प्रतिनिधी - फलटण शहरात बुलेट मोटारसायकलींच्या कर्कश फटफट आवाजामुळे आणि बिना नंबर प्लेटच्या वाहनांमुळे त्रस्त झालेल्या नागरिकांना आता दिलासा मिळण्याची चिन्हे दिसत आहेत. नागरिकांच्या वाढत्या तक्रारींची दखल घेत फलटण पोलिसांनी कारवाईचा बडगा उगारत विशेष मोहीम सुरू केली आहे.
गेल्या काही दिवसांपासून शहरात काही वाहनचालकांकडून सायलेंसरमध्ये बदल करून मोठा आवाज करणाऱ्या बुलेट चालविण्याच्या घटना वाढल्या होत्या. तसेच अनेक दुचाकी बिना नंबर प्लेट फिरत असल्याने चोरीच्या घटनांना चालना मिळत असल्याची भीती नागरिकांमध्ये निर्माण झाली होती. या प्रकारामुळे नागरिक अक्षरशः भीतीच्या छायेखाली वावरत होते.
या पार्श्वभूमीवर पोलिसांनी अशा वाहनांवर थेट कारवाई करत बिना नंबर प्लेट तसेच नियमबाह्य सायलेंसर असलेल्या दुचाकी जप्त करण्यास सुरुवात केली आहे. जप्त केलेल्या वाहनांची आरटीओमार्फत तपासणी करून पुढील कायदेशीर कारवाई करण्यात येणार असल्याची माहिती पोलिसांकडून देण्यात आली आहे. या मोहिमेमुळे शहरातील बेफाम व नियमबाह्य वाहनचालकांवर नक्कीच चाप बसणार असल्याचे नागरिकांचे मत आहे.
संबंधित बातम्या
