सरडे येथील त्या युवकाच्या नातेवाईकांना ४ लाख रुपये मंजूर : तहसीलदार डॉ. अभिजित जाधव

फलटण प्रतिनीधी:- सरडे, ता. फलटण येथे वादळी वाऱ्यासह झालेल्या पावसात वीज अंगावर पडल्याने निधन झालेल्या विद्यार्थ्यांच्या वारसांना केंद्र सरकारच्या पंधराव्या वित्त आयोगा अंतर्गत राज्य आपत्ती प्रतिसाद निधी (एसडीआरएफ) नुसार नैसर्गिक आपत्ती निधी मधून ४ लाख रुपये मंजूर झाली असल्याची माहिती तहसीलदार डॉ. अभिजित जाधव यांनी दिली.

शनिवार दिनांक ११ मे २०२४ रोजी सायंकाळी ६ वाजण्याच्या सुमारास धायगुडेवस्ती, सरडे, ता. फलटण येथे इलेक्ट्रिकल दुचाकीवरून चाललेल्या तिघा विद्यार्थ्यांवर अचानक वीज कोसळली त्यामध्ये दुचाकीवरील ज्ञानेश्वर गहिनीनाथ ढोले (वय १७, रा. वंजारवाडी (खर्डा), ता. जामखेड जि. अहमदनगर) या युवकाचा मृत्यू झाला होता. तर प्रथमेश सुनील भिसे (वय- १७ रा. वायसेवाडी, ता. कर्जत, जि. अहमदनगर), विक्रम विजय धायगुडे (वय-१६ रा. सरडे, ता. फलटण) हे दोन जण जखमी झाले होते. 

तहसीलदार डॉ. अभिजित जाधव यांनी नैसर्गिक आपत्ती मुळे मृत्यू झाल्यास मृत्यू झालेल्या वारसांना ४ लाख रुपये शासकीय मदत देण्याची तरतूद असून राज्य सरकारकडून या निकषांप्रमाणेच आपत्ती काळात केंद्र सरकारच्या पंधराव्या वित्त आयोगा अंतर्गत राज्य आपत्ती प्रतिसाद निधी (एसडीआरएफ) नुसार नुकसान भरपाईचे वितरण करण्यात येते दिली जाते. त्यानुसार महसूल विभागाकडून पाहणी करून पंचनामा करण्याच्या सूचना देवून त्यानुसार आसू महसूल मंडलाधिकारी दिलीप कोकरे आणि सरडे तलाठी सचिन माने यांनी आवश्यक निकषानुसार कागद पत्रांची पूर्तता करुन घेतली. या नंतर तहसीलदार डॉ. अभिजित जाधव यांनी जिल्हाधिकारी कार्यालय, सातारा यांच्याकडे अहवाल सादर केला.

या घटनेत मृत्यू पावलेल्या स्व. ज्ञानेश्वर ढोले याचे वारसदार वडील गहिनीनाथ शंकर ढोले व आई सौ. पुष्पा गहिनीनाथ ढोले यांना फलटण येथील तहसील कार्यालयात बोलावून घेऊन निकषानुसार आवश्यक कागद पत्रांची तपासणी करून मदतीची ४ लाख रुपयांची रक्कम गहिनीनाथ शंकर ढोले यांच्या बँक खात्यात जमा करण्याबाबत जिल्हाधिकारी कार्यालय, सातारा यांच्याकडे अहवाल पाठवून शिफारस केली. जिल्हाधिकारी कार्यालय, सातारा यांच्याकडून मदतीची रक्कम गहिनीनाथ शंकर ढोले यांच्या बँक खात्यावर लवकरच जमा होणार आहे. गहिनीनाथ शंकर ढोले यांनी व त्यांच्या कुटुंबीयांनी तहसीलदार डॉ. अभिजित जाधव व महसूल विभागाच्या अधिकारी व कर्मचाऱ्यांचे आर्थिक मदतीच्या संदर्भात केलेल्या सहकार्यामुळे आभार मानले.