फलटणमध्ये पोलिसांच्या आशिर्वादाने अवैध धंदे तेजीत

फलटण प्रतिनिधी - मटका, जुगार, चक्री, आदी अवैध धंदे तेजीत सुरू असताना पोलिस अधिकारी झोपेचे सोंग घेत आहेत. अवैध धंद्यांवर कारवाईचा फास आवळण्यात महत्त्वाची भूमिका असलेली स्थानिक गुन्हे शाखा वसुलीच्या कामात गर्क असून फलटण मधील तरुण वर्ग गुटखा व जुगाराच्या आहारी गेला असून शहरातील अनेक भागात अवैध धंद्याचा जोर वाढला आहे.

शहरात धूम स्टाइलने महिलांच्या गळ्यातील दागिने हिसकावणे, जबरी चोर्‍या व घरफोड्या हे गुन्हे नित्याचे झाले आहेत. शहरात मटका जोरात सुरू असून संबंधितांवर कारवाई करण्याऐवजी त्यांना संरक्षण पुरवण्यात येत आहे. खुद्द पोलिस अधिकाऱ्याच्या शासकीय निवासस्थानाकडे तसेच पोलिस ठाणाकडे जाणाऱ्या परिसरात टपरीवर मटका व गुटखा विक्री खुलेआम सुरू आहे. स्थानिक पोलिसांशी संगनमत करून खुलेआम मटका चालतो असा आरोप नागरिक करत आहेत.

फलटण शहरात जुगाराचे मोठे अड्डे असून ठरावीक रक्कम पोलिसांना दरमहा पोहोच केली जात असल्याने त्यांच्यावर कारवाई होत नाही. शहराच्या मध्यवस्तीत राजरोसपणे जुगार, चक्री सुरू असताना पोलिस दुर्लक्ष करतात. तर कोळकी, जाधववाडी अशा भागातही खुलेआम अवैध धंदे सुरू आहेत.शहरात मटक्याच्या अनेक टपर्‍या सुरू आहेत. त्यांच्याकडून दरमहा हजारो रुपये घेतले जातात. जुगाराचे मोठे अड्डे सुरू असून त्यांच्याकडून मोठ्या प्रमाणात आर्थिक तडजोड केली जाते. तर चक्री सारखे खेळ शहराच्या मध्यवस्तीस्त सुरु आहेत. पोलिसांच्या आशीर्वादाने सुरु असलेल्या अवैध धंद्याने अनेकांचे संसार उध्वस्त होण्याच्या मार्गावर आहेत. 

अनेक टपरीवर उघडपणे गुटखा विक्री होत आहे.तरुण युवकांना गुटखा दारूसह मटक्याचे व्यसन जडले आहे. अवैध धंद्याच्या विक्रीतून मोठ्या प्रमाणात चांगले आर्थिक उत्पन्न मिळत असल्यामुळे अनेक व्यक्‍तींनी या व्यवसायात उडी घेतली आहे. मात्र या अवैध धंद्यामुळे अनेकांचे संसार उघड्यावर आले असून महिला व युवतींमध्ये असुरक्षिततेची भावना निर्माण झाली आहे. कामगार व तरुण युवकांना दारू, मटका, गुटखा यांचे व्यसन जडले असल्याने अनेकांचे संसार उघड्यावर आले आहेत. यामुळे या अवैध धंद्यावर करवाई करण्याची मागणी नागरिकांमधून होत आहे. 

पोलिस ठाण्यात तक्रार दाखल करण्यासाठी येणाऱ्या नागरिकांची अथवा निवेदन देण्यास संघटनेच्या पदाधिकाऱ्यांशी पोलिस उद्धटपणे बोलत असून याबाबत वरिष्ठ अधिकाऱ्याकडे याबाबत तक्रारी करूनही वरिष्ठ अधिकाऱ्यांकडून कोणत्याही प्रकारची कारवाई केली जात नाही.

जिल्हा पोलिस प्रमुख समीर शेख लक्ष देणार का? 

जिल्हा पोलिस प्रमुख समीर शेख यांनी फलटण शहरातील अवैध व्यवसायाला पोलिसांचे अभय मिळत असताना कोणती भूमिका घेणार याकडे फलटणकरांचे लक्ष लागले आहे. सुसंस्कृत फलटण शहराला अकार्यक्षम व अवैध धंद्यांना अभय देणाऱ्या अधिकाऱ्यांमुळे शहर वासियांना संकटाना सामोरे जावे लागत आहे.