फलटण येथे स्वातंत्र्य दिन उत्साहात संपन्न

फलटण प्रतिनिधी :- 'स्वातंत्र्याच्या अमृत महोत्सवी वर्षानिमित्त “माझी माती माझा देश” या अनोख्या अभियानाच्या माध्यमातून प्रधानमंत्री नरेंद्र मोदी यांनी स्वातंत्र्यासाठी हौतात्म्य पत्करलेल्या हुतात्म्यांच्या व वीर सैनिकांच्या स्मरणार्थ शहीद आणि वीरांचा नामोल्लेख असलेला शीलाफलक अनावरण करून देशाच्या स्वातंत्र्यासाठी लढलेल्या, सर्वस्व गमावलेल्या, बलिदान दिलेल्या सर्व ज्ञात अज्ञात देशवीरांप्रती - नतमस्तक होण्याची, अभिवादन करण्याची संधी उपलब्ध करुन दिली असे प्रतिपादन फलटण नगर परिषद प्रशासक तथा मुख्याधिकारी संजय गायकवाड यांनी केले.

दि. १४ रोजी फलटण नगर परिषदेच्या आवारात या अभियानांतर्गत उभारण्यात आलेल्या शीला फलकावर फलटण शहरातील ज्यांनी देशासाठी, स्वातंत्र्यासाठी, सुरक्षेसाठी बलिदान दिले अशा थोर शहीद व्यक्तींची नावे शीला फलकावर कोरण्यात आली असून या शीला फलकाचे अनावरण सैन्य दलातील निवृत्त सैनिक आणि सैन्य दलातील शहिद झालेल्या जवानांच्या कुटुंबीयांच्या हस्ते करण्यात आले. यावेळी उपस्थित शहीद जवानांच्या कुटुंबीयांचे वृक्ष भेट देऊन आभार मानण्यात आले.स्वातंत्र्यसैनिकांचे बलिदान व्यर्थ जाऊ न देता त्यापासून प्रेरणा घेऊन देशाच्या प्रगतीसाठी प्रयत्नांसाठी प्रत्येक भारतीयाला प्रेरित करणारा हा उपक्रम नगर परिषद यांच्याकडून करण्यात आला आहे.

स्वातंत्र्य मिळवण्यासाठी अनेकांनी बलिदान दिले, स्वातंत्र्यलढ्यात अनेक क्रांतिकारक, स्वातंत्र्यसैनिक, समाजसुधारक, ज्ञात-अज्ञात देशवासीयांनी प्राणांची आहुती दिली. अनेकांनी दिलेल्या त्यागामुळेच स्वातंत्र्याची पहाट उगवली. स्वातंत्र्य मिळून ७५ वर्षे होत असतानाच त्यांच्या या त्यागाचे स्मरण करणे सर्वांचे आद्य कर्तव्य असल्याचे फलटण नगरपरिषद प्रशासक तथा मुख्याधिकारी संजय गायकवाड यांनी स्पष्ट केले.

दि. १५ रोजी जलशुध्दीकरण केंद्र येथे ७५ देशी वृक्षारोपांची लागवड करीत अमृत वाटिका तयार करण्यात आली या वेळी आंबा, नारळ, पेरू, चिक्कू, अशा विविध ७५ देशी वृक्ष रोपांचे वृक्षारोपण पत्रकार व नगर परिषद अधिकारी तसेच कर्मचारी यांच्या हस्ते करण्यात आले. यावेळी पाणी साठवण तलावाचे अमृत सागर असे नामकरण समारंभपूर्वक करण्यात आले. या दोन्ही कार्यक्रमांना पत्रकार, शहरातील विविध संस्थांचे पदाधिकारी, शहरवासीय नागरिक, स्वातंत्र्यसैनिक आणि सैन्य दलातील निवृत्त अधिकारी, कर्मचारी, त्यांचे कुटुंबीय, नगर परिषद अधिकारी, कर्मचारी मोठया संख्येने उपस्थित होते.