राजेंची चौथ्या दिवशीही आयकर विभागाकडून चौकशी सुरुच : तब्ब्ल 80 तासाहून अधिककाळ चौकशी

फलटण प्रतिनिधी - संजीवराजे नाईक निंबाळकर आणि रघुनाथराजे नाईक निंबाळकर यांच्या घरी 5 फेब्रुवारीला सकाळी 6 वाजता आयकर विभागाने छापा टाकल्याची माहिती समोर आली होती. त्यानंतर राज्याच्या राजकारणामध्ये मोठी खळबळ उडाली होती. तर आज सलग चौथ्या दिवशीही राजेंची आयकर विभागाकडून चौकशी सुरुच होती. आज सकाळी आयकर विभागाच्या अधिकाऱ्यांनी सकाळी लवकरच चौकशी सुरु केली. 

 गोविंद मिल्क अँड मिल्क प्रॉडक्ट, कुरोली फुड्स, श्रीमंत मालोजीराजे सहकारी बँक, श्रीराम सहकारी साखर कारखाना यासह विविध उद्योगांच्या आर्थिक देवाण-घेवाणीची चौकशी सुरु होती. दरम्यान संजीवराजे नाईक निंबाळकर यांच्यासह आयकर विभागाच्या अधिकाऱ्यांनी श्रीमंत मालोजीराजे सहकारी बँकेमध्ये जाऊन आर्थिक व्यवहाराची तपासणी केल्याचे खात्रीलायक वृत्त आहे. 

दरम्यान आज चौथ्या दिवशीही संजीवराजे नाईक निंबाळकर यांच्या फलटण येथील सरोज व्हीला या निवासस्थानाबाहेर त्यांच्या समर्थकांनी मोठी गर्दी केली होती. यामध्ये विविध गावचे पुढारी, आजी - माजी पदाधिकारी सकाळपासूनच ठाण मांडून होते.दीर्घ काळ सुरू असणाऱ्या चौकशी काळत बाहेर बसणारे कार्यकर्ते आता तणावात नसले तरी काहीसा मानसिक थकवा त्यांना आला असल्याचे दिसत आहे. 

सगळं व्यवस्थित आहे - श्रीमंत सौ. शिवांजलीराजे नाईक निंबाळकर 

संजीवराजे नाईक निंबाळकर यांच्या सुविद्य पत्नी सौ. शिवांजलीराजे यांनी कार्यकर्त्यांना दिलासा देत सगळं व्यवस्थित आहे काळजी चे काहीच कारण नाही या वेळी त्यांनी स्मितहास्य देखील केले कोणत्याही प्रकारचा तणाव दिसत नव्हता या मुळे आयकरच्या चौकशीचे हे शेपूट आज संपेल अशी कार्यकर्त्यांना तरी आशा आहे मात्र आयकर विभागाची टीम अतिशय शांत पणे विविध प्रकारची व लोकांची तपासणी सरोज व्हीला मध्ये करत आहे 

तुम्ही सगळे जमल्याचे पाहून आधार वाटला - सत्यजितराजे 

 चौकशीच्या चौथ्या दिवशी संजीवराजे यांचे पुत्र सत्यजितराजे त्यांच्या आई सौ.शिवांजलीराजे यांच्या समवेत कार्यकर्त्यांसमोर आले. सरोज व्हीला बाहेर बसलेल्या आपल्या कार्यकर्त्यांचे त्यांनी आभार मानले व प्रवासातून येताना थोडं टेन्शन आलं होतं पण तुम्ही सगळे जमल्याने पाहून आधार वाटला आता केवळ कागदपत्र पूर्णत्वाचे काम राहिले असून लवकरच ते संपेल तुम्ही तुमच्या कामाला गेलात तरी चालेल असे सांगितले.

राष्ट्रवादीचे जेष्ठ नेते रामराजे ना निंबाळकर याचे चुलत बंधू संजीवराजे व रघुनाथराजे यांच्या निवासस्थानी गेली 80 तास आयकर विभागाच्या चौकशीचे शेपूट लांबतच चालले असून इतक्या दीर्घ कालावधी नंतर ही आयकर विभागाची चौकशी संजीवराजे यांच्या सरोज व्हीला मध्ये सुरूच आहे. विविध ठिकाणी सुरू असणाऱ्या चौकशीला वेग आला होता मात्र आज सलग चवथ्या दिवशीही आयकरची कारवाई सुरूच आहे.