फलटण आगाराच्या नवीन बसेसचा लोकार्पण सोहळा संपन्न - मा. खा. रणजितसिंह ना. निंबाळकर व आ.सचिन पाटील यांच्या प्रयत्नाने फलटण आगाराला नव्या बसेस

फलटण प्रतिनिधी -

फलटण आगारात नवीन बसेसच्या आगमनाने प्रवाशांच्या सुविधेच्या दृष्टीने एक महत्त्वपूर्ण पाऊल उचलले गेले आहे. फलटण आगाराला १० नवीन एस.टी. बसेस मिळाल्या आहेत, या बसेसचे लोकार्पण माजी खासदार रणजितसिंह नाईक निंबाळकर व आमदार सचिन पाटील यांच्या उपस्थितीत संपन्न झाले. नवीन बसेस पैकी फलटण - शिंगणापूर व फलटण - गोंदवले अशा दोन बस प्रवाशांना घेऊन रवाना झाल्या.

माजी खासदार रणजितसिंह नाईक निंबाळकर यावेळी बोलताना म्हणाले की, फलटण शहरातील प्रमुख असणारे फलटण बसस्थानकाचा सर्वांगीण विकास करण्यासाठी राज्य शासनाच्या माध्यमातून आपण प्रयत्नशील आहोत. राज्यातील इतर जे विकसित बसस्थानक आहेत त्याच्या धर्तीवर आपण फलटण बसस्थानकाचा विकास करणार असल्याची घोषणा यावेळी माजी खासदार रणजितसिंह यांनी केली.

फलटण आगार व बस स्थानक इमारती जुन्या झाल्या असून वाढत्या प्रवासी संख्येसाठी त्या पुरेशा नसल्याने नवीन अद्ययावत, सुसज्ज व प्रशस्त इमारती उभारण्यासाठी प्रयत्न सुरू आहेत. या नवीन इमारतींमध्ये प्रवाशांसाठी आवश्यक सुविधा पुरवण्यात येतील, ज्यामुळे प्रवाशांची सोय-सुविधा वाढेल.

फलटण आगारात गेल्या अनेक दिवसापासून बसेसच्या कमतरतेमुळे प्रवाशांना अनेक समस्यांचा सामना करावा लागत होता. फलटण आगाराला नव्या २० बसेस मंजूर करण्यात आल्या आहेत. यामधील पहिल्या टप्प्यात १० बसेस ह्या फलटण आगारात दाखल झाल्या आहेत.त्यामुळे फलटण एस. टी. आगारातून मुंबई, पुणे, मलकापूर, औरंगाबाद, नाशिक, नगर, कोल्हापूर वगैरे अनेक लांब पल्ल्याचा प्रवास आता सुखकारक होणार आहे.

मागणी केलेल्या बस पैकी दहा नव्या बस आज फलटण आगारात दाखल झाल्याने तालुक्यातील स्थानिक अनेक मार्गावरील बस फेऱ्या कमी करण्यात आल्या होत्या त्या पुन्हा सुरु होतील अशी अशा प्रवाशांकडून व्यक्त करण्यात आली. 

यावेळी फलटण आगाराचे अधिकारी, कर्मचारी यांच्यासह बहुसंख्य चालक वाहक कर्मचारी, प्रवाशी उपस्थित होते.