सातार्‍यात चोरट्यांचा धुडगूस; लाखो रुपयांचा मुद्देमाल नेला चोरुन

सातारा : सातारा शहरातील तांदुळ आळी, संगमनगर, पंताचा गोट व धनगरवाडी येथे चोरट्यांनी धुडगूस घातला. या चार ठिकाणी चोरट्यांनी जबरी चोरी, घरफोडी, दुचाकी चोरत लाखो रुपयांचा मुद्देमाल चोरुन नेला.
जबरी चोरी प्रकरणी तेजस सुर्यकांत मोडक (वय 30, रा.सोमवार पेठ, तांदुळआळी) यांनी शाहूपुरी पोलिस ठाण्यात तक्रार दिली आहे. तक्रारदार यांनी म्हटले आहे की, उषा दामोदर माजगावकर (वय 81, रा.तांदुळआळी) या त्यांच्या नातेवाईक असून ते एका परिसरात वास्तव्य करत आहेत. दि. 1 रोजी रात्री 9 वाजता अज्ञात चोरट्याने वृध्देचा घरी जावून त्यांना मारहाण केली. वृध्दा घरी एकटीच असल्याने चोरट्याने वृध्देला बांधून घरातील देवाच्या मुर्ती चोरुन नेल्या. या घटनेत वृध्दा जखमी झाल्याने त्यांना उपचारासाठी दाखल करण्यात आले आहे. यामुळे त्या शुध्दीत आल्यानंतर घरातून नेमके आणखी काय चोरीला गेले आहे? हे समजणार आहे. दरम्यान, तांदुळ आळीतील या घटनेने परिसरात भितीचे वातावरण निर्माण झाले आहे.
संगमनगर येथे घरफोडी प्रकरणी हरिदास विठोबा शिंदे (वय 62, रा. संगमनगर) यांनी शहर पोलिस ठाण्यात तक्रार दिली आहे. अज्ञात चोरट्यांनी बंद घराचे कुलुप तोडून घरातून 40 हजार रुपये किंमतीची सोन्याची चेन, 20 हजार रुपयांची इम्पोर्टेड बॅटरी असा सुमारे 61 हजार रुपयांचा ऐवज चोरुन नेला. ही घटना दि. 14 नोव्हेबर ते 2 डिसेंबर या कालावधीत घडली असल्याचे तक्रारीत म्हटले आहे.
याशिवाय सातारा शहर परिसरातून दोन दुचाकी चोरी झाल्या आहेत. गणेश रविंद्र जगताप (वय 3%, रा.जगतापवाडी, शाहूनगर) यांनी दिलेल्या तक्रारीत म्हटले आहे की, दि. 1 रोजी एम एच 11 क्यू 5497 ही दुचाकी अज्ञात चोरट्याने पंताचा गोट येथून चोरुन नेली. दुसर्या दुचाकीची चोरीची तक्रार सुधीर विठ्ठल हिरवे (वय 24, रा. धनगरवाडी, सातारा) यांनी तक्रार दिली आहे. दि. 29 नोव्हेबर रोजी धनगरवाडी येथून अज्ञात चोरट्याने त्यांची एम एच 11 एव्ही 6742 ही दुचाकी चोरुन नेली.