ग्रेड सेपरेटरमध्ये झाली कार पलटी

सातारा : सातारच्या ग्रेड सेपरेटरमध्ये बुधवारी रात्री कार पलटी झाली. भरधाव वेगात कारवरील नियंत्रण सुटल्याने हा अपघात झाला. सुदैवाने यामध्ये कोणालाही गंभीर दुखापत झाली नाही. अपघातात कारची चारही चाके वर झाली होती. अपघातानंतर कार चालकाने क्रेन बोलावून कार ताब्यात घेतली. दरम्यान, अपघातानंतर पीसीआर व्हॅन देखील घटनास्थळी गेली होती.
याबाबत अधिक माहिती अशी, एक युवक कार घेऊन बसस्थानकातून राजवाड्याकडे येत होता. ग्रेड सेपरेटरमधून तो वळण घेऊन राजवाड्याकडे जात असताना अचानक चालकाचे नियंत्रण सुटल्याने ग्रेडसेपरेटरमध्ये ही कार पलटी झाली. चालक कारमधून बाहेर आल्यानंतर या अपघाताची माहिती पीसीआर व्हॅनला समजली. त्यानंतर पीसीआरचे कर्मचारी ग्रेड सेपरेटरमध्ये पोहोचले. चालकाला फारशी जखम झाली नव्हती. दरम्यान, काहीवेळानंतर संबंधित कार चालकाने क्रेनच्या साह्याने कार नेली. याबाबत कोणाचीही तक्रार नसल्याने या अपघाताची नोंद शहर पोलीस ठाण्यात झाली नाही. दरम्यान, हा अपघात नेमका कसा झाला, हे सीसीटीव्हीतून समोर येणार असल्याचे पोलिसांनी सांगितले.