गाव पांढरीच्या वैभवखुणा या ग्रंथास शिविम साहित्य पुरस्कार

फलटण प्रतिनिधी -

शिवाजी विद्यापीठ मराठी शिक्षक संघ, (शिविम) कोल्हापूर व रयत शिक्षण संस्थेचे सावित्रीबाई फुले महिला महाविद्यालय आयोजित राष्ट्रीय चर्चासत्र व शिविमचे १५ वे अधिवेशन नुकतेच सातारा येथे संपन्न झाले. या अधिवेशनात मुधोजी महाविद्यालय, फलटण येथील मराठी विभागातील प्राध्यापक डॉ. अशोक शिंदे यांना त्यांच्या ‘गाव पांढरीच्या वैभवखुणा’ या ग्रंथासाठीचा शिवाजी विद्यापीठ मराठी शिक्षक संघाचा ‘ललितेत्तर साहित्य पुरस्कार’ कर्मवीर भाऊराव पाटील विद्यापीठाचे कुलगुरू डॉ. ज्ञानदेव म्हस्के यांच्या शुभहस्ते प्रदान करण्यात आला. या प्रसंगी शिवाजी विद्यापीठ कोल्हापूर मराठी अधिविभाग प्रमुख व जेष्ठ मराठी समीक्षक प्रो. डॉ. रणधीर शिंदे, शिविमचे अध्यक्ष डॉ. भरत जाधव, शिविमच्या १५ व्या अधिवेशनाचे अध्यक्ष व प्रसिद्ध साहित्यिक प्रो. डॉ. रफिक सूरज, सावित्रीबाई फुले महिला महाविद्यालयाचे प्राचार्य डॉ. शिवलिंग मेनकुदळे व इतर मान्यवर उपस्थित होते. 

निवृत्त प्राचार्य डॉ . प्रकाश कुंभार यांच्या ५० हजार रुपयांच्या देणगीच्या व्याजातून दिला जाणारा हा पुरस्कार यावर्षी प्रा. डॉ. अशोक शिंदे, मुधोजी महाविद्यालय, फलटण यांच्या ‘गाव पांढरीच्या वैभवखुणा’ या ग्रंथास जाहीर करण्यात आला होता. दरवर्षी होणाऱ्या शिविमच्या अधिवेशनात या पुरस्काराचे वितरण करण्यात येते. यावर्षी शिविमचे १५ वे अधिवेशन सावित्रीबाई फुले महाविद्यालय सातारा येथे आयोजित करण्यात आले होते. या अधिवेशनाच्या उद्घाटन सोहळ्यात या पुरस्काराचे वितरण करण्यात आले. लेखक अशोक शिंदे यांचा हा ग्रंथ सातारा येथे संपन्न झालेल्या अखिल भारतीय मराठी साहित्य संमेलनाच्या प्रकाशन मंडपात प्रकाशित झाला होता. या ग्रंथास अखिल भारतीय मराठी साहित्य संमेलनाचे माजी अध्यक्ष व जेष्ठ मराठी साहित्यिक तथा समीक्षक डॉ. श्रीपाल सबनीस यांची प्रस्तावना तर साहित्यिक व प्रसिद्ध व्याख्याते डॉ. यशवंत पाटणे यांची पाठराखण लाभली आहे. ग्रामिण व कृषिजीवनातील नामशेष होत चाललेल्या साधनांचे महत्त्व, उपयोगिता आणि त्यांचे सांस्कृतिक व सामाजिक स्थान ललित रम्य भाषेतून लेखक शिंदे यांनी या ग्रंथात मांडले आहे. एकूण अठरा ललित लेख असलेल्या या ग्रंथात भारतीय कृषी ग्रामीण संस्कृतीतील प्रमुख साधनांचे प्राचीन ते आधुनिक काळातील वैभव शब्दबद्ध केलेले आहे. ही साधने म्हणजे केवळ वापरायच्या वस्तू नसून ही साधने म्हणजे आपल्या संस्कृतीचा अमूल्य व जिवंत वारसा आहेत. काळाच्या ओघात आधुनिक माहिती तंत्रज्ञान तथा डिजिटल क्रांतीच्या युगात वापरात नसलेल्या व विस्मृतीत जाऊ पाहणाऱ्या या ग्रामीण संस्कृतीचे सजीव दर्शन घडविणाऱ्या या ग्रंथात आपल्या या समृद्ध जीवन वारशाच्या वैभवखुणा चित्रित झाल्या आहेत. त्यामुळे हा ग्रंथ सद्या वाचक व समीक्षक यांच्या पसंतीला उतरत आहे.

 प्रा. शिंदे यांस प्राप्त झालेल्या या पुरस्काराबद्दल फलटण एज्युकेशन सोसायटीचे अध्यक्ष मा. श्रीमंत रामराजे नाईक निंबाळकर, चेअरमन श्रीमंत रघुनाथराजे नाईक निंबाळकर व सेक्रेटरी श्रीमंत संजीवराजे नाईक निंबाळकर तसेच महाविद्यालयाचे प्राचार्य डॉ. पी. एच. कदम आणि विविध क्षेत्रातील मान्यवर याशिवाय शिविम परिवार व महाविद्यालयातील शिक्षक यांनी लेखक शिंदे यांचे अभिनंदन केले आहे. तसेच त्यांना पुढील यशासाठी शुभेच्छा दिल्या आहेत.