फलटण पालिकेसाठी 70 टक्के मतदान वाढलेले मतदान बदलणार निकाल ?

फलटण प्रतिनिधी -

फलटण नगरपरिषद सार्वत्रिक निवडणुकीमध्ये सकाळपासूनच मतदारांनी मतदान केंद्रावर मतदान करण्यासाठी चांगलीच रांग लावली होती यामध्ये किरकोळ बाचापाची वगळता तसेच प्रभाग क्रमांक 13 मध्ये मतदान यंत्रावर बटन दाबले जात नसल्याने तब्बल तीन ते चार उमेदवार तसेच उमेदवारांच्या प्रतिनिधींनी अधिकाऱ्यांकडे तक्रार करूनही मशीन बदलण्यासाठी अधिकाऱ्यांनी निरुत्साह दाखवल्याने अधिकाऱ्यांवर कारवाई करण्याची मागणी करण्यात आली होती. 

फलटण नगरपालिका निवडणूक 2 डिसेंबर ऐवजी आज शनिवार दिनांक 20 डिसेंबर रोजी मतदान पार पडले 45514 पैकी 31990(पुरुष 15859 स्त्री 16129 व इतर 2) मतदारांनी मतदान केले,या झालेल्या मतदानाची 70.29 टक्केवारी झाली असल्याची माहिती निवडणूक निर्णय अधिकारी तथा प्रांताधिकारी प्रियंका आंबेकर यांनी दिली,ही मतमोजणी 13 टेबलावर 5 फेऱ्या होणार आहे दरम्यान ही मतदानाची वाढलेली टक्केवारी कोणाला तारक तर कोणाला मारक ठरणार हे उद्या रविवार दिनांक 21 डिसेंबर रोजी दुपारपर्यंत स्पष्ट होईल. 

   फलटण नगरपालिका निवडणुकीमध्ये भारतीय जनता पार्टी व राष्ट्रवादी काँग्रेस युतीचे उमेदवार समशेरसिंह नाईक निंबाळकर तसेच शिवसेनेचे उमेदवार श्रीमंत अनिकेत राजे रामराजे नाईक निंबाळकर यांच्यात तुल्यबळ लढत पाहायला मिळाली यामुळे कोण कोणाला चितपट करणार याकडे सर्वांचे लक्ष लागून राहिले आहे. फलटण शहरातील सर्वच मतदान केंद्रावर तगडा पोलीस बंदोबस्त ठेवण्यात आला होता यामध्ये प्रभाग क्रमांक दोन प्रभाग क्रमांक चार या ठिकाणी काही उमेदवार व उमेदवारांचे प्रतिनिधी यांच्यामध्ये किरकोळ बाचाबाची झाली त्याचबरोबर एका महिला मतदाराला पोलिसांनी लाठी हल्ला केल्याची चर्चा होत होती यामुळे अगोदरच फलटण नगरपालिकेची निवडणूक ही फार मोठी अटीतटीची आणि हातगाहीची होती यामुळे फलटण शहरातील प्रत्येक मतदान केंद्रावर तगडा पोलीस बंदोबस्त ठेवण्यात आला होता. 

 फलटण नगरपालिकेमध्ये थेट नगराध्यक्ष पद व 27 नगरसेवक यांचे राजकीय भवितव्य आज मतदान यंत्रामध्ये बंद झाले असून उद्या सकाळी दहा वाजता निकालाला सुरुवात होईल 13 टेबल वरती ही मतमोजणी होणार असून या मतमोजणीची संपूर्ण तयारी करण्यात आली असून उद्या रविवार दिनांक 21 रोजी निकालानंतर तब्बल नऊ वर्षानंतर फलटण पालिकेला नगराध्यक्ष तसेच नगरसेवक मिळणार असून भाजपा व शिवसेनेमध्ये झालेली तगडी लढत संपूर्ण सातारा जिल्ह्यात गाजली असून भाजपा की शिवसेना सत्तेत बसणार याची उत्कंठा फलटणमध्ये शिगेला पोहोचले आहे.

दरम्यान फलटण कोरेगाव चे विद्यमान आमदार सचिन पाटील तसेच भाजपाचे नगराध्यक्ष पदाचे उमेदवार समशेरसिंह नाईक निंबाळकर अन् नगराध्यक्षपदाचे उमेदवार श्रीमंत अनिकेत राजे रामराजे नाईक निंबाळकर या तिघांनी प्रभाग क्रमांक 13 मध्ये आपले मतदानाचा हक्क बजावला त्याचबरोबर प्रभाग क्रमांक दोन तीन आणि चार या ठिकाणी साडेपाच वाजून गेल्यानंतरही मतदार मोठ्या संख्येने आपल्या मतदानाचा हक्क बजावण्यासाठी भल्या मोठ्या रांगेमध्ये उभे होते.