फलटण नगरपालिकेत उद्या होणार ऐतिहासिक पदग्रहण सोहळा - 35 वर्षाच्या सत्ता परिवर्तन तर फलटणमध्ये उत्साहाची लाट

फलटण | प्रतिनिधी

फलटण नगरपालिकेच्या राजकारणात उद्या एक नवा आणि ऐतिहासिक अध्याय लिहिला जाणार आहे. तब्बल ३५ वर्षांनंतर झालेल्या राजकीय सत्ता परिवर्तनानंतर फलटणमध्ये परिवर्तनाची लाट उसळली असून, या पार्श्वभूमीवर भाजपाचे लोकनियुक्त नगराध्यक्ष समशेरसिंह नाईक निंबाळकर उद्या सोमवार दिनांक 29 डिसेंबर 2025 रोजी सकाळी 10 वाजता अधिकृतपणे नगराध्यक्ष पदग्रहण करणार आहेत. 

सर्वसामान्य कुटुंबातून आलेल्या समशेरसिंह नाईक निंबाळकर यांनी जनतेच्या विश्वासाच्या जोरावर हे सर्वोच्च नागरी पद पटकावले असून, त्यांचा हा प्रवास अनेक तरुणांसाठी प्रेरणादायी ठरत आहे. त्यांच्या विजयाने केवळ सत्तांतरच नव्हे तर फलटणच्या राजकारणात नवी दिशा मिळाल्याची चर्चा शहरात सुरू आहे.

उद्याच्या पदग्रहण सोहळ्यामुळे फलटण शहरात उत्साहाचे वातावरण निर्माण झाले आहे. शहरभरात आनंद, जल्लोष आणि अपेक्षांची लाट पाहायला मिळत असून, हा ऐतिहासिक क्षण छायाचित्रे आणि व्हिडिओंच्या माध्यमातून “फ्रेम”मध्ये कैद होणार आहे.

या पदग्रहण सोहळ्यासाठी राजकीय, सामाजिक तसेच प्रशासकीय क्षेत्रातील विविध मान्यवरांची उपस्थिती लाभणार असल्याने कार्यक्रमाचे महत्त्व आणखी वाढले आहे. नागरिक, कार्यकर्ते आणि समर्थकांमध्ये मोठी उत्सुकता असून, फलटणच्या विकासाच्या नव्या पर्वाची सुरुवात उद्यापासून होणार असल्याची भावना सर्वत्र व्यक्त होत आहे.

फलटणकरांसाठी उद्याचा दिवस केवळ पदग्रहणाचा नसून, नव्या आशा, अपेक्षा आणि परिवर्तनाच्या स्वप्नांचा ऐतिहासिक क्षण ठरणार आहे.

फलटण नगरपालिकेच्या राजकारणात उद्या एक ऐतिहासिक क्षण साकारत असताना, या आनंदाच्या क्षणी एक भावनिक पोकळीही प्रकर्षाने जाणवणार आहे. नवनिर्वाचित नगराध्यक्ष समशेर सिंह नाईक निंबाळकर यांच्या पदग्रहण सोहळ्यावेळी त्यांचे वडील, माजी खासदार कै. हिंदुराव नाईक निंबाळकर यांची उणीव सर्वांनाच भासणार आहे.

फलटणच्या राजकारणात मोलाचे योगदान देणारे, दूरदृष्टी असलेले नेतृत्व म्हणून ओळखले जाणारे कै. हिंदुराव नाईक निंबाळकर हे जनतेच्या मनात आजही आदराने स्मरले जातात. त्यांच्या मार्गदर्शनाखाली अनेक कार्यकर्ते घडले आणि सार्वजनिक जीवनात मूल्यांची परंपरा निर्माण झाली.

आज त्यांच्या पावलावर पाऊल ठेवत समशेर सिंह नाईक निंबाळकर नगराध्यक्ष पदाची शपथ घेणार असले, तरी या ऐतिहासिक क्षणी वडिलांची छाया, त्यांचे मार्गदर्शन आणि आशीर्वाद नसल्याची भावना अनेकांच्या मनात आहे. कार्यकर्ते, समर्थक आणि ज्येष्ठ नागरिकांकडून “आज हिंदुराव नाईक निंबाळकर असते तर…” अशा भावना व्यक्त केल्या जात आहेत.

हा पदग्रहण सोहळा जरी विजयाचा आणि परिवर्तनाचा असला, तरी त्यामागे कै. हिंदुराव नाईक निंबाळकर यांच्या विचारांची आणि कार्याची परंपरा पुढे नेण्याची जबाबदारीही समशेर सिंह नाईक निंबाळकर यांच्यावर येऊन ठेपली आहे. फलटणच्या विकासाच्या या नव्या पर्वात त्यांच्या आठवणी कायम प्रेरणादायी ठरणार आहेत.

यावेळी मा. खासदार रणजितसिंह नाईक निंबाळकर, आमदार सचिन पाटील, ज्येष्ठ नेते प्रल्हादराव साळुंखे पाटील, दिलीपसिंह भोसले माजी नगराध्यक्ष, शिवरूपराजे खर्डेकर तालुकाध्यक्ष राष्ट्रवादी काँग्रेस पार्टी, ॲड. नरसिंह निकम अध्यक्ष फलटण तालुका संघर्ष समिती, सौ जिजामाला रणजितसिंह नाईक निंबाळकर, माजी जिल्हा परिषद सदस्या, सौ प्रतिभाताई शिंदे तालुका अध्यक्षा राष्ट्रवादी काँग्रेस पार्टी उपस्थित राहणार आहेत.

तरी भाजप, राष्ट्रवादी काँग्रेस व महायुतीतील सर्व घटक पक्ष, पदाधिकारी, सर्व नागरिक, व्यापारी, महिला व कार्यकर्त्यांनी उपस्थित रहावे असे आवाहन करण्यात आले आहे.