चार वर्षाच्या मुलाला बिबट्याने केले ठार

कराड : ऊस तोडणी कामगारांच्या चार वर्षाच्या चिमुरड्यावर बिबट्याने हल्ला करून त्याला ठार केले. ही दुर्देवी घटना (सोमवार) सकाळी साडेसहा ते पावणेसात वाजण्याच्या सुमारास येणे (ता. कराड) येथे घडली. यामुळे परिसरात खळबळ उडाली आहे. आकाश बिगाशा पावरा असे बिबट्याच्या हल्ल्यात ठार झालेल्या चिमुरड्याचे नाव आहे.
याबाबत अधिक माहिती अशी की,  कारखान्यांचा हंगाम जोरात सुरू असून गावागावांमध्ये उसतोडणी कामगारांचा वावर दिसून येत आहे. येणके येथेही ऊस तोडणी कामगारांकडून ऊस तोडणी केली जात आहे. आज सकाळी येणके-करपे रस्त्यावरून इनाम नावच्या शिवारात ऊस तोडणीसाठी कामगार निघाले होते. या ऊस तोडणी टोळीतील काही कामगार पुढे चालले होते. तर एक महिला चार वर्षांच्या चिमुरडीला घेऊन त्यांच्या पाठीमागे निघाली होती.
याच संधीचा फायदा घेऊन बिबट्याने ऊस तोडणी कामगारांच्या पाठीमागे असलेल्या चिमुरड्यावर हल्ला केला. यावेळी महिलेने आरडाओरडा करताच ऊस तोडणी कामगार मागे फिरले. ही बाब काही क्षणातच गावात समजल्याने ग्रामस्थांनी घटनास्थळी गर्दी केली. ऊस तोडणी कामगारांसह ग्रामस्थांनी चिमुरड्याचा उसाच्या फडात शोध सुरु केला. त्यावेळी उसाच्या फडात काही अंतरावर चिमुरड्याचा मृतदेह आढळून आला.
परिसरात गेल्या अनेक महिन्यापासून बिबट्याचा वावर आहे. त्याचा बंदोबस्त करावा, अशी मागणी ग्रामस्थांनी अनेकदा केली होती. मात्र, बिबट्याच्या बंदोबस्तासाठी पिंजरा लावण्यात न आल्याचा ग्रामस्थांचा आरोप आहे. यापूर्वीही येणके गावामध्ये बिबट्या उसाच्या शिवारात आला होता.