कृष्णा बँकेच्या सुवर्णमहोत्सवी वर्षाचा सांगता सोहळा उत्साहात

कराड : शेतकऱ्यांची हक्काची बँक अशी ओळख असलेल्या कृष्णा सहकारी बँकेने नोव्हेंबर २०२० मध्ये ५० व्या सुवर्णमहोत्सवी वर्षात यशस्वी पदार्पण केले होते. या सुवर्णमहोत्सवी वर्षाचा सांगता सोहळा केंद्रीय अर्थराज्यमंत्री डॉ. भागवत कराड, महाराष्ट्र राज्य विधानसभेचे विरोधी पक्षनेते ना. देवेंद्र फडणवीस, भारतीय जनता पार्टीचे प्रदेशाध्यक्ष आ. चंद्रकांतदादा पाटील, य. मो. कृष्णा सहकारी साखर कारखान्याचे चेअरमन डॉ. सुरेश भोसले, कृष्णा बँकेचे चेअरमन डॉ. अतुल भोसले यांच्यासह मान्यवरांच्या उपस्थितीत उत्साहात संपन्न झाला.
कृष्णा बँकेसह सहकारमहर्षी मा. जयवंतराव भोसले (आप्पा) नागरी सहकारी पतसंस्था आणि कृष्णा महिला नागरी सहकारी पतसंस्था यांचा एकत्रित असा कृष्णा आर्थिक परिवार निर्माण झाला असून, या कृष्णा आर्थिक परिवाराच्या नव्या अद्ययावत कार्पोरेट कार्यालयाची उभारणी कृष्णा हॉस्पिटलच्या प्रांगणात करण्यात आली आहे. या नव्या इमारतीचे, तसेच बँकेच्या शाखा विस्तारित कक्षाचे उद्घाटन केंद्रीय अर्थराज्यमंत्री डॉ. भागवत कराड यांच्या हस्ते करण्यात आले.
यावेळी उपस्थित मान्यवरांनी कार्यालयाची पाहणी करून बँकेच्या संचालक मंडळाला भावी वाटचालीसाठी शुभेच्छा दिल्या. याप्रसंगी बँकेच्या ५० वर्षांच्या गौरवशाली कार्याचा आढावा घेणाऱ्या माहितीपटाचे प्रदर्शनही करण्यात आले.
यावेळी कर्नाटकचे उद्योगमंत्री ना. मुरुगेश निराणी, केंद्रीय आरोग राज्यमंत्री डॉ. भारती पवार यांचे सहाय्यक ओमप्रकाश शेटे, महाराष्ट्र राज्य सहकारी परिषदेचे माजी अध्यक्ष शेखर चरेगावकर, श्री. विनायक भोसले, कराडच्या नगराध्यक्षा सौ. रोहिणी शिंदे, जि. प. सदस्या सौ. शामबाला घोडके, भाजपाचे तालुकाध्यक्ष पैलवान धनाजी पाटील, बँकेचे व्हाईस चेअरमन दामाजी मोरे, संचालक शिवाजीराव थोरात, हेमंत पाटील, प्रदीप थोरात, प्रमोद मा. पाटील, बाळासो पवार, चंद्रहास जाधव, नामदेव कदम, हर्षवर्धन मोहिते, तातोबा थोरात, संतोष पाटील, दिनकर गडाळे, ॲड. विजयकुमार पाटील, व्यवस्थापकीय मंडळाचे अध्यक्ष सचिन तोडकर, सदस्य गुणवंतराव जाधव, बँकेचे मुख्य कार्यकारी अधिकारी चंद्रकांत कापसे, मुख्य व्यवस्थापक भगवान जाधव, किरण पाटील यांच्यासह अधिकारी, कर्मचारी व सभासद मोठ्या संख्येने उपस्थित होते.