हनी ट्रॅप करून एकाकडून ५० हजार रूपयांची खंडणी, सात जणांच्या विरोधात गुन्हा दाखल 

फलटण प्रतिनिधी: हनी ट्रॅप करून एका तरुणाकडून ५० हजार रूपयांची खंडणी वसूल करणाऱ्या सात जणांच्या विरूध्द फलटण शहर पोलिस ठाण्यात गुन्हा दाखल करण्यात आला असून याप्रकरणी फलटण तालुक्यात एकच खळबळ उडाली आहे.

फलटण शहर पोलिस स्टेशन कडून मिळालेल्या माहितीनुसार, दिनांक ५ जुलै २०२३ रोजी दुपारी 1.30 वाजण्याच्या सुमारास पाचबत्ती चौक फलटण ता. फलटण जि. सातारा येथे साक्षी उर्फ मोनिका किसन मोहिते (रा. पाचबत्ती चौक फलटण मूळ रा. शिंदेवाडी तालुका फलटण जि. सातारा) हिने फिर्यादी तरुणास मला तुला भेटायचं व पाहायचे आहे असे म्हणून भाड्याचे रूमवर बोलून घेऊन त्या ठिकाणी तिचे इतर सहा साथीदार आरोपी यांना फोन करून बोलावून घेऊन त्यांनी तू कुठला आहेस आमच्या बहिणी जवळ काय करतोस असे म्हणून मारहाण करून संशयीत आरोपी ऋषिकेश (पूर्ण नाव माहिती नाही) याने फिर्यादी तरुण यांच्याकडील जबरदस्तीने मोबाईल काढून घेऊन जबरदस्तीने गाडीमध्ये बसवून जुने आयटीआय कॉलेजचे जुन्या इमारती जवळ फलटण या ठिकाणी नेऊन दमदाटी व हाताने व दाता बुक्क्यांनी मारहाण करून तुझ्यावर साक्षीला सांगून बलात्काराचा गुन्हा दाखल करतो. जर गुन्हा दाखल करायचा नसेल तर तुला दोन लाख रुपये द्यावे लागतील असे म्हणून फिर्यादी तरुणास धमकावून व्हिडिओ काढून तसेच यातील महिला आरोपीने पोलीस असल्याचे सांगून तू कुणाचे घरात घुसतो तुला केस मध्ये गुंतवते असे म्हणून आरसी बुक काढून घेतले. त्याचे खात्यावर पैसे आहेत ते पैसे पोलिसांचे खात्यावर टाकून घ्या व तो पोलिसांना लाच देतो असे म्हणून यांचेवर आणखी एक गुन्हा दाखल करून घेते. असे म्हणून धमकावून हाताने मारहाण केली आहे. फिर्यादी तरुणास त्यांनी पैशाची मागणी केली तसेच त्याच्याजवळ पैसे नसल्याने मित्राच्या कडून ऑनलाईन पैसे घेऊन ते 50 हजार रुपये एटीएम मधून परस्पर काढून घेतले. 

याप्रकरणी शहर पोलिस ठाण्यात ऋषीकेश प्रल्हाद बोडरे (वय.२३ वर्षे रा. खुंटे ता. फलटण जि सातारा), धिरज अमोल लगाडे (वय १९ वर्षे रा. खुंटे ता. फलटण जि सातारा), प्रतिक विजय भंडलकर (वय १९ वर्षे रा. खुंटे ता. फलटण जि सातारा), सौ. मोनिका ऊर्फ साक्षी किसन मोहिते (वय २३ वर्षे मुळ रा. शिंदेवाडी ता.फलटण जि.सातारा हल्ली रा. पाचचती चौक, फलटण जि.सातारा), सौ. सुहासिनी योगेश अहिवळे (वय.२९ वर्षे मूळ रा. मंगळवार पेठ, फलटण ता. फलटण जि. सातारा हल्ली रा. बिरदेव नगर, जाधववाडी ता. फलटण जि.सातारा) या पाच जणांना तसेच या गुन्ह्यात सामील असणाऱ्या दोन अल्पवयीन मुलांना अटक करण्यात आली असून वरील पाच संशयीत आरोपींना न्यायालयासमोर हजर करण्यात येणार असून दोन अल्पवयीन मुलांवर कारवाई करण्यात येणार आहे. 

सदर गुन्हयाचा तपास सातारा पोलिस अधीक्षक समीर शेख अप्पर पोलिस अधिक्षक बापू बांगर उपविभागीय पोलिस अधिकारी राहुल धस यांचे मार्गदर्शनाखाली पोलिस निरीक्षक फलटण शहर सुनिल शेळके, सहाय्यक पोलिस निरीक्षक केनेकर, पोलिस उपनिरीक्षक सुरज शिंदे, पोलीस उपनिरीक्षक अमोल कदम, पोलीस उपनिरीक्षक दिपाली गायकवाड, पो.ना.सचिन जगताप,पोलिस कॉन्स्टेबल सचिन पाटोळे, महेश जगदाळे, यांनी केला आहे. सदर गुन्हयाचा तपास पोलीस उपनिरीक्षक सुरज शिंदे करीत आहेत.

फलटण शहर पोलिस ठाण्याचे पोलिस निरीक्षक सुनिल शेळके यांनी जाहीर आवाहन केले आहे की, जर अशा प्रकारची घटना कोणा बरोबर घडली असल्यास त्यांनी फलटण शहर पोलिस ठाण्याशी संपर्क साधावा त्यांचे नांव गोपनीय ठेवण्यात येईल.