फलटण कृषी उत्पन्न बाजार समितीचे माजी चेअरमन पोपटराव काकडे यांचे अकस्मात निधन

फलटण प्रतिनिधी दि. १८ जुलै २०२६

कृषी उत्पन्न बाजार समिती फलटणचे माजी चेअरमन पोपटराव मारुती काकडे यांचे वयाच्या ७५ व्या वर्षी आज शनिवारी सकाळी अकस्मात निधन झाले. ते सन १९८४ ते १९९३ दरम्यान बाजार समितीचे संचालक आणि त्यानंतर सन १९९३ ते १९९८ दरम्यान बाजार समितीचे चेअरमन होते.

 हिंगणगाव, ता. फलटण येथील शेतकरी कुटुंबातून आलेले पोपटराव काकडे यांनी अत्यंत प्रतिकूल परिस्थितीत शिक्षण पूर्ण केल्यानंतर प्रारंभी प्राथमिक शिक्षक आणि त्यानंतर जयभवानी एज्युकेशन सोसायटीमध्ये माध्यमिक शिक्षक आणि मुख्याध्यापक म्हणून उत्तम काम केले.

माजी आमदार स्व. चिमणराव कदम यांचे अत्यंत निष्ठावान सहकारी म्हणून त्यांच्याकडे पाहिले जात असे त्या काळातील राजकीय सामाजिक क्षेत्रात माजी आमदार स्वर्गीय चिमणराव कदम यांच्या समवेत काम करताना त्यांनी तालुक्याच्या विकास प्रक्रियेत अत्यंत उत्तम काम केले, त्यामुळेच त्यांना विधानसभेच्या निवडणुकीसाठी दोन वेळा उमेदवारी देण्यात आली होती.

कृषी उत्पन्न बाजार समितीमध्ये प्रारंभी संचालक आणि त्यानंतर चेअरमन म्हणून सलग १० - १५ वर्षे त्यांनी शेतकरी हिताला प्राधान्य देऊन उत्तम काम केले. त्यांच्याच कार्यकाळात बाजार समितीच्या फळे भाजीपाल्याचे नियमन करणेत आले, त्यानंतर प्रत्यक्ष फळे भाजीपाला मार्केट स्वतंत्रपणे सुरु करण्यात आले.

बाजार समिती संचालक असतानाच ते गिरवी मतदार संघातून जिल्हा परिषदेवर निवडून आले, आणि त्यानंतर एक वेळ त्यांना जिल्हा परिषद समाजकल्याण समितीवर स्वीकृत सदस्य म्हणून नियुक्त करण्यात आले. जिल्हा नियोजन व विकास समितीचे सदस्य म्हणूनही त्यांनी काम केले.    

सेवानिवृत्तीनंतर जाधववाडी फलटण येथे त्यांचे वास्तव्य होते, त्यामुळे त्यांचे पार्थिव आज शनिवारी दुपारी २ वाजेपर्यंत जाधववाडी येथील निवासस्थानी अंत्यदर्शनासाठी ठेवण्यात आले, त्यानंतर त्यांच्या मूळ गावी हिंगणगाव ता. फलटण येथे सायंकाळी त्यांच्या पार्थिवावर अंत्यसंस्कार करण्यात आले. त्यावेळी विविध क्षेत्रातील मान्यवरांसह आप्तेष्ट, मित्रमंडळी, आणि हिंगणगाव पंचक्रोशीसह तालुक्याच्या विविध गावातून आलेले ग्रामस्थ मोठ्या संख्येने उपस्थित होते.