5 लाखाची खंडणी प्रकरणी 3 जणांविरोधात गुन्हा दाखल

फलटण प्रतिनिधी:- प्लॉट मध्ये टाकलेल्या मुरुमांची तक्रार करून लाखो रुपयांचा दंड बसविल अशी धमकी देत जातिवाचक शिवीगाळ करत व 5 लाख रुपयांची खंडणी मागितल्या प्रकरणी शहर पोलीस ठाण्यात तीन जाणाच्या विरोधात गुन्हा दाखल करण्यात आला आहे. 

फलटण शहर पोलीस ठाण्यातून मिळालेल्या माहितीनुसार,फिर्यादी संजय विष्णु राऊत (रा. बिरदेवनगर, जाधववाडी ता. फलटण) यांचा प्लॉट खरेदी विक्रीचा व्यवसाय असुन दि. 13/09/2022 रोजी फिर्यादी यांनी मौजे जाधववाडी ता. फलटण जि. सातारा येथील सव्हें नं.45 मधील एकुण 46गुंठे जागे पैकी 13 गुंठे जागा खरेदीखताणे खरेदी केलेली आहे. सदर जागेमध्ये चढउतार असल्याने फिर्यादी व जमिनीचे मुळ मालक विलास जगन्नाथ पालखे यांनी मिळुन जेसीबी च्या सहाय्याने पुर्ण सपाट केली आहे. सदर जागेचे सपाटीकरण करणे करीता परवाना घेतला नसल्याने महसुल विभागाकडुन पंचनामा करणेत आलेला आहे. सदर 46 गुंठे जागेमधुन खरेदीखताणे फिर्यादी राऊत यांच्या वाट्याला 13 गुंठे जागा आली असून सदर जागेस फिर्यादी राऊत यांनी गेले दोन महिन्यापूर्वी तार कम्पाउन्ड करुन घेतले आहे. त्यामधील 3 गुठ्यांमध्ये फिर्यादी यांच्या घराचे काम चालु आहे.

दि. 17/01/2023 रोजी सायं. 4.30 वाजण्याच्या सुमारास फिर्यादी राऊत हे त्यांचे दोन मित्र यांच्या सोबत ऑफिस मध्ये बसलेले असताना त्यांना फोन आला की विजय संभाजी गाडे, संतोष बाळासाहेब बिचुकले व तलाठी त्याचे सोबत काही अनोळखी इसम हे जागेची पाहणी करुन पंचनामा करणेसाठी आलेले आहेत, तसेच विजय संभाजी गाडे, संतोष बाळासाहेब बिचुकले हे माझ्या सोबत वाद घालत आहेत यानंतर फिर्यादी राऊत हे जाधववाडी येथील सर्व्हे नं. 45 या ठिकाणी सायंकाळी 5 वाजण्याच्या सुमारास गेले असता फिर्यादी राऊत गाडीतून खाली उतरताच रोडवर उभे असलेले विजय संभाजी गाडे (रा. नरसिंह चौक, रविवार पेठ फलटण ता. फलटण) याने फिर्यादी यांना जातीवाचक हाक मारून इकडे ये "असे म्हणुन त्याने व संतोष बाळासाहेब बिचुकले (रा. भडकमकर नगर फलटण ता फलटण जि.सातारा) तसेच सागर चव्हाण (रा. सोमवार पेठ फलटण ता. फलटण) यांनी फिर्यादी यांना शिवीगाळ दमदाटी करणेस सुरुवात केली व संतोष बिचुकले यांनी फिर्यादी यांचा हात धरून पिरगळला व ते तिथे म्हणाले की, तुझ्या वरती आम्ही वेगवेगळ्या ठिकाणी तक्रारी अर्ज करुन तुला लाखो रुपयाचा दंड बसवु तुझ्या विरुद्ध जर कुठे तक्रार करावयाची नसेल तर त्या बदल्यात तु आम्हाला पाच लाख रुपये दे आम्ही तुझा विषय संपवितो असे म्हणाले. सदर ठिकाणी तलाठी हे आले व त्यांनी तुमच्या जागेत टाकलेल्या मुरुमा बाबत तक्रारी अर्ज आलेला आहे म्हणुन मी व पंच या ठिकाणी आलेलो आहे असे सांगितले. यानंतर तेथुन निघुन जातेवेळी विजय गाडे, संतोष बिचुकले व सागर चव्हाण हे तु आम्हाला पाच लाख रुपये देणार आहे किंवा नाही याबाबत तु आम्हाला लवकरात लवकर निरोप कळव असे म्हणुन ते तेथुन निघुन गेले. फिर्यादी संजय विष्णु राऊत यांनी जातिवाचक शिवीगाळ करणे व खंडणी मागणे या प्रकरणी शहर पोलीस ठाण्यात दिलेल्या फिर्यादीवरून विजय संभाजी गाडे व संतोष बाळासाहेब बिचुकले तसेच सागर चव्हाण या तीन जाणाच्या विरोधात गुन्हा दाखल करण्यात आला आहे. अधिक तपास उपविभागीय पोलीस अधिकारी तानाजी बरडे करीत आहेत.