डीजे व फटाकेमुक्त आंबेडकर जयंतीचा आदर्श घ्यावा : तहसीलदार डॉ. अभिजित जाधव

फलटण प्रतिनिधी : 

पिंपरद (ता. फलटण) येथे डॉ. बाबासाहेब आंबेडकर जयंती निमित्ताने डीजे व फटाकेमुक्त जयंती साजरी करण्याचा अभिनव उपक्रम राबवून समाजापुढे एक वेगळा आदर्श ठेवण्यात आला आहे. या संकल्पनेतून नाहक खर्च टाळून त्या बचतीतून गरजू व मागासवर्गीय विद्यार्थ्यांना शालेय गणवेश व शैक्षणिक साहित्य देण्याचा उपक्रम राबविणाऱ्या बाबासाहेब आंबेडकर जयंती उत्सव समिती, पिंप्रद यांचा लवकरच गौरव करण्यात येणार असल्याची माहिती तहसीलदार डॉ. अभिजित जाधव यांनी दिली.

भारतरत्न डॉ. बाबासाहेब आंबेडकर यांच्या 135 व्या जयंतीनिमित्त पिंपरद येथील डॉ. बाबासाहेब आंबेडकर सभागृहात रक्तदान शिबिराचे आयोजन करण्यात आले. या शिबिराचे उद्घाटन तहसीलदार डॉ. अभिजित जाधव यांच्या हस्ते पार पडले. या वेळी जेष्ठ पत्रकार तथा माजी नगरसेवक अजय माळवे, निवासी नायब तहसीलदार अभिजित सोनवणे, नायब तहसीलदार तुषार गुंजवटे, कोरेगाव चे सहाय्यक महसूल अधिकारी लक्ष्मण अहिवळे, मंडल अधिकारी फलटण शिलवंत चव्हाण, मंडल अधिकारी आदर्की योगेश धेंडे, पिंपरद शाळा समिती अध्यक्ष जनार्दन भगत आदी उपस्थित होते.

या वेळी बोलताना डॉ. जाधव यांनी सांगितले की, डीजे व फटाकेमुक्त जयंती साजरी करून समाजात सकारात्मक संदेश दिला जात असून, या माध्यमातून उभा राहणारा निधी समाजोपयोगी कार्यासाठी वापरणे ही अत्यंत प्रेरणादायी बाब आहे.

प्रास्ताविक करताना उत्सव समितीचे मार्गदर्शक सचिन मोरे यांनी सांगितले की, गेल्या चार वर्षांपासून समिती सातत्याने समाजाभिमुख उपक्रम राबवत असून जयंती केवळ एक दिवसापुरती मर्यादित न ठेवता वर्षभर विविध सामाजिक कार्यक्रम आणि विद्यार्थी शिबिरे आयोजित केली जातात.

कार्यक्रमाच्या शेवटी मार्गदर्शक शरद मोरे यांनी आभार मानले. यावेळी विक्रांत मोरे, विकास मोरे, बापूराव मोरे, संतोष मोहिते, अमर मोरे, राहुल मोरे, विजय बनसोडे आदी पदाधिकारी उपस्थित होते. रक्तदान शिबिरास नागरिकांचा उत्स्फूर्त प्रतिसाद लाभला.