खुन प्रकरणातील दोन आरोपीना जन्मठेप व प्रत्येकी रुपये ३ लाख दंडाची शिक्षा.

फलटण प्रतिनीधी:- मौजे दुधेबावी येथे झालेल्या एका खुनाच्या प्रकरणात दोन आरोपीना जन्मठेप व प्रत्येकी रुपये ३ लाख दंडाची शिक्षा दंडाच्या रकमेपैकी रक्कम रुपये ५ लाख इतकी नुकसान भरपाई मयताच्या कुटुंबियांना देण्यात यावी असा निर्णय जिल्हा व सत्र न्यायाधीश सातारा यांनी दिला आहे.

फलटण शहर पोलिस ठाण्यातून मिळालेल्या माहितीनुसार, फलटण दि.४/७/२०२० रोजी सकाळी ७ वाजण्याच्या सुमारास मौजे दुधेबावी ता. फलटण जि. सातारा गावचे हद्दीत आरोपी १) हणमंत महादेव सोनवलकर वय ४८ वर्ष, क्र.२) सुनिता हणमंत सोनवलकर वय ३८ वर्ष, क्र.३) अनिकेत हणमंत सोनवलकर वय २३ वर्ष, क्र.४) शंभुराज हणमंत सोनवलकर वय २१ वर्ष सर्व रा. दुधेबावी ता. फलटण जि.सातारा यांनी मयत ज्ञानदेव महादेव सोनवलकर (वय ४० वर्ष रा. दुधेबावी ता. फलटण जि.सातारा) यांना सामाईक जमीन वाटुन देत नाही याकारणावरुन आरोपी हणमंत महादेव सोनवलकर व सुनिता हणमंत सोनवलकर यांनी शिवीगाळ करुन त्यांचे हातातील लोखंडी पाईपने मयत यांना मारहाण केली. 

तसेच आरोपी अनिकेत हणमंत सोनवलकर याने त्याचे हातातील कुन्हाड मयताचे उजवे हाताचे दंडावर मारली व आरोपी शंभुराज हणमंत सोनवलकर याने त्याचे हातात असलेल्या लोखंडी गजाने ज्ञानदेव महादेव सोनवलकर यांच्या डोक्यात मारहाण करुन गंभीर दुखापत करुन जखमी केले. ज्ञानदेव महादेव सोनवलकर यांच्या डोक्यास मार लागल्याने रक्तस्त्राव होऊ लागल्याने त्यांना उपचारासाठी सुविधा हॉस्पीटल, फलटण येथे अॅडमिट केले व तेथे उपचार घेत असताना त्यांचा मृत्यु झाला होता.

सदर गुन्हयाचा तपास तत्कालीन पोलीस निरीक्षक नितीन सावंत, पोलीस उप-निरीक्षक यु. एस. शेख फलटण ग्रामीण पोलीस स्टेशन यांनी करुन मा. न्यायालयात दोषारोप पत्र पाठवण्यात आले होते.सदरचा खटला मा.श्री.व्ही. आर. जोशी प्रमुख जिल्हा व सत्र न्यायाधीश सो, सातारा यांचे कोर्टात चालला होता. सरकारतर्फे श्रीमती वैशाली पाटील सहाय्यक संचालक व सरकारी अभियोक्ता, सातारा यांनी खटल्याचे कामकाज पाहिले. नमुद केसमध्ये एकुण ११ साक्षीदार तपासले, केवळ परिस्थितीजन्य पुरावा व प्रत्यक्षदर्शी साक्षीदारांचे साक्षीवरून तसेच सरकारी वकील यांचा युक्तीवाद व आरोपीने केलेल्या कृत्याबाबत न्यायालयात समोर आलेला पुरावा व सरकारी वकील यांचेकडील पुरावे ग्राह्य मानुन मा. प्रमुख जिल्हा व सत्र न्यायाधीश, सो सातारा यांनी दिनांक २४/१/२०२४ रोजी यातील आरोपी अनिकेत हणमंत सोनवलकर व शंभुराज हणमंत सोनवलकर यांना भा. द. वि. कलम ३०२, ३४ अन्वये जन्मठेप व प्रत्येकी ३ लाख रुपये दंड, दंड न दिलेस १ वर्ष साधा कारावास अशी शिक्षा दिली आहे. सदर दंडाच्या रकमेपैकी रक्कम रुपये ५ लाख इतकी नुकसान भरपाई मयताच्या कुटुंबियांना देण्यात यावी. तसेच आरोपी हणमंत महादेव सोनवलकर व सुनिता हणमंत सोनवलकर यांना CRPC २३५ (१) अन्वये ३०२ या शिक्षा पात्र गुन्हयासाठी निर्दोष मुक्त करणेत आले आहे.

उप-विभागीय पोलीस अधिकारी श्री. राहुल धस फलटण विभाग फलटण, सुनिल महाडीक पोलीस निरीक्षक फलटण ग्रामीण पोलीस स्टेशन यांचे मार्गदर्शनाखाली पैरवी अधिकारी म्हणुन म.पो.हवा.ब.नं. साधना कदम व पो. अंमलदार ब.नं. बडे नेमणुक फलटण ग्रामीण पोलीस ठाणे यांनी कामकाज पाहिले. याकामी पोलीस प्रॉसिक्यूशन स्क्वॉडचे पोलीस उप-निरीक्षक उदय दळवी, सुनिल सावंत यांचे मार्गदर्शनाखाली पो.हवा. मंजूर मणेर, म. पो. हवा शेख, पो. अंमलदार अमित भरते यांनी मदत केली.