फलटणमध्ये डॉ. बाबासाहेब आंबेडकर जयंतीनिमित्त पोलिसांचा रूट मार्च

फलटण प्रतिनिधी - 

फलटण शहर पोलीस ठाणे हद्दीत सोमवार दि. 13 एप्रिल 2026 रोजी सायंकाळी 5.50 ते 6.55 या वेळेत भारतरत्न डॉ. बाबासाहेब आंबेडकर जयंतीनिमित्त पोलिसांच्या वतीने भव्य रूट मार्च काढण्यात आला.

जयंती उत्सवाच्या पार्श्वभूमीवर कायदा व सुव्यवस्था अबाधित राहावी, तसेच नागरिकांमध्ये सुरक्षिततेची भावना निर्माण व्हावी आणि उत्सव भयमुक्त वातावरणात शांततेत पार पडावा, या उद्देशाने हा रूट मार्च आयोजित करण्यात आला होता.

सदर रूट मार्चची सुरुवात छत्रपती शिवाजी महाराज चौक येथून होऊन बारामती चौक, मंगळवार पेठ, धम्मायान चौक, कुरेशी नगर, आखरी रस्ता, पाचबत्ती चौक, रविवार पेठ, उपजिल्हा रुग्णालय मार्गे पुन्हा शिवाजी महाराज चौक आणि डॉ. बाबासाहेब आंबेडकर चौक येथे समारोप करण्यात आला.

या रूट मार्चमध्ये फलटण शहर पोलीस ठाण्याचे 6 अधिकारी, 27 अंमलदार, SRPF चे एक सेक्शन, होमगार्डचे 40 जवान तसेच 4 पोलीस वाहने सहभागी झाली होती.

या उपक्रमामुळे शहरात कायदा व सुव्यवस्था राखण्याबाबत पोलिसांची सज्जता दिसून आली असून नागरिकांमध्ये सुरक्षिततेचा विश्वास निर्माण झाला आहे.