समता घरेलू कामगार संघटना, असंघटित कामगारांसाठी आधारस्तंभ : निवासी नायब तहसीलदार अभिजित सोनवणे

फलटण  : | धैर्य टाईम्स | १६ डिसेंबर २०२४

असंघटित घरेलू कामगारांना संघटित करण्याचे महत्वपूर्ण कार्य समता घरेलू कामगार संघटना करीत असून घरेलू कामगारांना त्यांचे हक्क व सन्मान मिळावा यासाठी प्रयत्नशील असलेली ही संघटना त्यांचा आधारस्तंभ आहे. या संघटनेस आपले सर्वोतोपरी सहकार्य राहील याची ग्वाही निवासी नायब तहसीलदार अभिजित सोनवणे यांनी दिली.

समता घरेलू कामगार संघटनेच्यावतीने घरेलू कामगारांना हक्क व सन्मान मिळावा यासाठी सातारा जिल्ह्यात विशेष अभियान राबविण्यात येत आहे. त्याचाच एक भाग म्हणून फलटण शहरात नंदिवाले वसाहत येथे आयोजित कार्यक्रमात निवासी नायब तहसीलदार सोनवणे बोलत होते. यावेळी महाराष्ट्र उद्योजकता विकास केंद्र, सातारच्या प्रकल्प अधिकारी शीतल पाटील, संघटनेच्या संस्थापक अध्यक्षा कल्पना मोहिते यांच्यासह घरेलु कामगार महिला उपस्थित होत्या. 

स्वतःचा व्यवसाय सुरु करुन त्याद्वारे उत्तम अर्थार्जनातून यशस्वी महिला उद्योजक बनण्यासाठी जिल्हा उद्योग केंद्राच्या माध्यमातून महिलांना सेवा व उत्पादन व्यवसायासाठी मार्गदर्शन करण्याची ग्वाही देत प्रकल्प अधिकारी शीतल पाटील यांनी विविध योजनांची माहिती दिली. कल्पना मोहिते यांनी सर्व उपस्थितांचे स्वागत केल्यानंतर प्रास्ताविकात संघटनेचे कार्य, उद्दिष्टे व सातारा जिल्ह्यातील संघटनेचे कार्य  याबाबतची माहिती दिली. उपस्थितांचे स्वागत सुनीता कांबळे, सुनीता भिंगारे यांनी, समारोप व आभार अनिता गुंजाळ यांनी मानले.