उद्योजक उमेश निंबाळकरांचा माजी खासदार रणजितसिंह नाईक निंबाळकर यांना पाठिंबा

फलटण प्रतिनिधी –

फलटणच्या राजकीय वातावरणात एक महत्त्वपूर्ण घडामोड समोर आली आहे. गेल्या आठ वर्षांपासून राजकारणापासून पूर्णपणे दूर राहिलेले फलटणचे सुप्रसिद्ध उद्योजक उमेश निंबाळकर यांनी अखेर राजकीय पटलावर पुनरागमन करत आपल्या जिवलग मित्र तथा माढा लोकसभा मतदारसंघाचे माजी खासदार रणजितसिंह नाईक निंबाळकर यांना अधिकृत पाठिंबा घोषित केला आहे.

आज खास भेटीत उमेश निंबाळकर यांनी रणजितसिंह नाईक निंबाळकर यांच्याशी दीर्घ चर्चा करून, "आम्ही पुन्हा एकत्र आलो आहोत… बालपणीची मैत्री आता लोकहितासाठी वापरणार," असे स्पष्ट केले.

या भेटीत रणजितसिंह नाईक निंबाळकर यांनी स्वतः पुढे येत उमेश निंबाळकर यांचे आलिंगन देऊन स्वागत केले. दोघांमधील जिव्हाळा आणि मैत्रीचा भाव पाहून उपस्थितांच्या भावना उचंबळून आल्या.

या घटनाक्रमाने फलटण आणि माढा मतदारसंघात राजकीय समीकरणात नवे वळण लागणार असल्याची चर्चा आता जोरात सुरु आहे. विशेषतः या दोघांच्या एकत्र येण्याला "आगामी निवडणुकीतील महत्त्वाचा टप्पा" म्हणून राजकीय विश्लेषकांकडून पाहिले जात आहे.

फलटणमध्ये या भेटी आणि निर्णयाची जोरदार चर्चा असून समर्थकांमध्ये उत्साहाचे वातावरण पाहायला मिळत आहे.