मलवडी जंगलातील खुनाचा अवघ्या ३ तासात उलगडा करुन आरोपी जेरबंद : फलटण ग्रामीण पोलिसांची कारवाई 

फलटण प्रतिनिधी -

मलवडी, ता. फलटण गावचे हद्दीतील रहिवाशी असलेल्या अनिल नामदेव चव्हाण वय ४२ वर्ष हे नेहमीप्रमाणे प्रातः विधीसाठी मलवडी गावचे हद्दीतील फॉरेस्ट नावच्या शिवारात गेले असता कोणीतरी अज्ञात इसमांनी धारदार शस्त्राने त्यांचे डोक्यात वार करून त्यांचा जागीच खुन केल्याची माहिती दि. १९/१०/२०२३ रोजी सकाळी ०८.०० वा. चे सुमारास फलटण ग्रामीण पोलीस ठाणेचे पोलीसांना प्राप्त होताच त्यांनी लागलीच घटनास्थळी भेट दिली असता अनिल नामदेव चव्हाण यांचा मृतदेह निर्जनस्थळी रक्ताचे थारोळ्यात पडलेला दिसुन आला. त्यामुळे मयत अनिल नामदेव चव्हाण याचे पत्नीच्या तक्रारीवरून फलटण ग्रामीण पोलीस ठाणे येथे गुन्हा नोंद करण्यात आला आहे. त्या घटनेचा तपास अवघ्या तीन तासात करत आरोपीस जेरबंद करण्यास पोलिसांना यश मिळाले. 

फलटण ग्रामीण पोलीस ठाणेकडील पोलीस हे गोपनीय माहिती व परिस्थितीजन्य पुराव्याच्या आधारे सदर गुन्ह्याचा तपास करीत असताना मयत अनिल नामदेव चव्हाण याचा खुन हा महिलांबाबतच्या त्याच्या गैरवर्तणुकीच्या कारणावरुन झाल्याची माहिती प्राप्त झाली होती. परंतु त्याचा सख्खा मावसभाऊ असलेला आरोपी पोपट खाशाबा मदने हा "तो मी नव्हेच" या आविर्भावात गुन्ह्याचे घटनास्थळावरील बघ्याचे गर्दीमध्ये वावरत होता व पोलीसांच्या हालचालींवर लक्ष ठेवून होता. परंतु पोलीसांनी बघ्यांच्या गर्दीमधुन आरोपी पोपट खाशाबा मदने याच्या हालचाली व देहबोली चाणाक्षपणे हेरुन त्यास संशयाच्या आधारे चौकशीकामी ताब्यात घेतल्यानंतर त्याने सुरुवातीला ३ तास उडवाउडवीची उत्तरे देऊन दिशाभुल करणारी माहिती सांगत होता. परंतु पोलीसांनी प्राप्त परिस्थितीजन्य पुराव्याच्या आधारे त्याचेवर कौशल्यपूर्णरीतीने विविध प्रश्नांची सरबत्ती करीत त्यास पोलीस खाक्या दाखविताच त्याने त्याच्या अल्पवयीन मुलाच्या मदतीने अनिल नामदेव चव्हाण याचा खुन केल्याची कबुली दिली आहे. सदर गुन्ह्याचा पुढील तपास पोलीस निरीक्षक सुनिल महाडीक हे करीत आहेत.

सदरची कामगिरी पोलीस अधीक्षक मा. समीर शेख सो, अपर पोलीस अधीक्षक मा. आँचल दलाल व उपविभागीय पोलीस अधिकारी मा. राहुल धस यांच्या मार्गदर्शन व सुचनानुसार फलटण ग्रामीण पोलीस ठाणेचे पोलीस निरीक्षक सुनिल महाडीक यांचे नेतृत्वाखाली स. पो. नि. नवनाथ रानगट, स. पो. नि. अशोक हुलगे, पो. उ. नि. सागर अरगडे, पो. उ. नि. प्रमोद दीक्षत, पो, उ.नि. पाटील, पोलीस अमलदार संजय अडसुळ, गाडी, वैभव सूर्यवंशी, नितीन चतुरे, अमोल जगदाळे, श्रीनाथ कदम, अमोल पवार, विक्रांत बनकर, हनुमंत दडस, श्रीकांत खरात, विक्रम कुंभार, तुषार नलवडे, या पोलीस अधिकारी व अमलदारांनी केलेली आहे.