अवैध गांजाची वाहतुक करणाऱ्या दोघांना अटक, सुमारे 5 लाख 77 हजार 500 रुपये किंमतीचा 23 किलो गांजा जप्त

फलटण प्रतिनीधी:- फलटण ग्रामीण पोलिस ठाण्याच्या हद्दीत सांगवी, ता. फलटण येथे दुचाकी वरून अवैध गांजाची वाहतुक करणाऱ्या दोघांना अटक करण्यात आली असून सुमारे 5 लाख 77 हजार 500 रुपये किंमतीचा 23 किलो गांजा जप्त यावेळी जप्त करण्यात आला आहे.

फलटण ग्रामीण पोलिस ठाण्यातून मिळालेल्या माहितीनुसार, दि. 3 रोजी दोन इसम एका बजाज पल्सर मोटार सायकलवरुन बारामतीहुन फलटणकडे मोठ्या प्रमाणात गांजा विक्रीसाठी घेऊन जाणार आहेत अशी माहिती ग्रामीण पोलिसांना मिळाले असता पोलिस निरीक्षक सुनिल महाडीक यांनी सांगवी, ता. फलटण गावचे हद्दीत बारामती-फलटण रोड लगत सापळा लावला असता १२:०५ वाजण्याच्या सुमारास आशिष जालिंदर पवार (रा. पाहुणेवाडी, ता. बारामती, जि. पुणे) व कुणाल बाळासो कांबळे (रा. शारदानगर, माळेगाव कॉलनी, ता. बारामती, जि. पुणे) हे एका नंबरप्लेट नसलेल्या बजाज पल्सर मोटार सायकलवरुन सुमारे 5 लाख 77 हजार 500 रुपये किंमतीचा व 23 किलो वजनाचा गांजा एका पांढ-या रंगाच्या पोत्यातुन बारामतीहुन फलटणकडे घेऊन जात असताना ग्रामीण पोलिस पथकातील पोलीसांना आढळून आले. कारवाईत सापडलेला गांजा अक्षय चव्हाण (रा. शिरवली, ता. बारामती) यांच्या सांगण्यावरून फलटणकडे घेऊन जात असल्याचे त्यांनी तपासामध्ये सांगितले. यावेळी दुस-या मोटार सायकलवरुन त्यांना मदत करणारे करण मदने (रा. शिरवली, ता. बारामती) व दुसरा एक अनोळखी व्यक्ती हे घटनास्थळावरुन त्यांची मोटार सायकलवरुन पळुन गेले. सदर छापा कारवाईमध्ये एकुण सुका गांजा व विनानंबरप्लेटची बजाज पल्सर मोटार सायकल असा एकुण 7 लाख 27 हजार 500 रुपये किमतीचा मुद्देमाल जप्त करण्यात आला आहे.

सदरची कारवाई पोलिस अधीक्षक समीर शेख, अपर पोलिस अधीक्षक आँचल दलाल व उपविभागीय पोलिस अधिकारी राहुल धस यांच्या मार्गदर्शनाखाली गुन्हे प्रकटीकरण विभागाचे पोलिस उपनिरीक्षक गोपाल बदने, मच्छिंद्र पाटील, पोलिस अमंलदार नितीन चतुरे, वैभव सूर्यवंशी, श्रीनाथ कदम, संदीप मदने, योगेश रणपिसे, अमोल जगदाळे, तुषार आडके, श्रीकांत खरात, हनुमंत दडस, विक्रम कुंभार, सुरज काकडे, अमोल देशमुख, प्रिती काकडे, रशिदा पठाण यांनी केली.