फलटण नगरपालिकेचे उपनगराध्यक्षपद राष्ट्रवादी काँग्रेस पक्षालाच मिळावे –श्रीमंत शिवरूपराजे खर्डेकर यांची मागणी : जिल्हा परिषद पंचायत समिती करीता पन्नास टक्के जागा मिळाव्यात

फलटण | प्रतिनिधी

फलटण नगरपालिकेच्या सार्वत्रिक निवडणुकीत भारतीय जनता पक्ष, राष्ट्रवादी काँग्रेस पक्ष व मित्र पक्षांनी एकत्रितपणे निवडणूक लढवून ऐतिहासिक यश संपादन केले. तब्बल ३५ वर्षांची राजे गटाची सत्ता उलथवून लावत नगराध्यक्ष पदासह १८ नगरसेवक निवडून आणून बहुमत मिळवले आहे. भाजपाला नगराध्यक्ष पद मिळाले असून उपनगराध्यक्ष पद राष्ट्रवादी काँग्रेस पक्षाला मिळावे अशी भूमिका राष्ट्रवादी काँग्रेस पक्षाचे फलटण तालुका अध्यक्ष श्रीमंत शिवरूपराजे खर्डेकर यांनी मांडली आहे. तर येऊ घातलेल्या जिल्हा परिषद व पंचायत समिती निवडणुकी करिता 50 टक्के जागा मिळाव्यात अशी अपेक्षा श्रीमंत शिवरूपराजे खर्डेकर यांनी व्यक्त केली.

नगरपालिका निवडणुकीत भारतीय जनता पक्षाचे समशेरसिंह नाईक निंबाळकर यांना फलटणकरांनी नगराध्यक्षपदी निवडून दिले. मात्र या विजयात राष्ट्रवादी काँग्रेस पक्षानेही ताकदीने काम करत महत्त्वाची भूमिका बजावली आहे. प्रचार, संघटन आणि मतदारांपर्यंत पोहोचण्यात राष्ट्रवादी काँग्रेसच्या कार्यकर्त्यांचा मोठा सहभाग राहिला असल्याचे चित्र दिसून आले.

याच पार्श्वभूमीवर फलटण नगरपालिकेचे उपनगराध्यक्ष पद राष्ट्रवादी काँग्रेस पक्षाला मिळावे, अशी ठाम मागणी राष्ट्रवादी काँग्रेस पक्षाचे फलटण तालुका अध्यक्ष श्रीमंत शिवरूपराजे खर्डेकर यांनी केली आहे. माध्यमांशी बोलताना खर्डेकर म्हणाले की, “महायुतीच्या विजयात राष्ट्रवादी काँग्रेसचा वाटा मोठा आहे. त्यामुळे सत्तेतील सहभाग म्हणून उपनगराध्यक्ष पद राष्ट्रवादी काँग्रेसला मिळणे योग्य ठरेल.”

तथापि, त्यांनी पक्षांतर्गत शिस्त आणि एकात्मतेवर भर देत असेही स्पष्ट केले की, “महायुतीची कोअर कमिटी जो निर्णय घेईल, तो निर्णय आम्हाला मान्य असेल. पक्षाच्या आणि आघाडीच्या हितासाठी सर्वांनी एकत्रितपणे काम करणे महत्त्वाचे आहे.”

दरम्यान, उपनगराध्यक्ष पदावरून महायुतीतील हालचालींना वेग आला असून, अंतिम निर्णयाकडे फलटणकरांचे लक्ष लागले आहे. कोअर कमिटी काय भूमिका घेते आणि सत्तेतील समतोल कसा राखला जातो, यावर आगामी राजकीय घडामोडी अवलंबून असणार आहेत.

मात्र येऊ घातलेला जिल्हा परिषद व पंचायत समिती निवडणुकीमध्ये भारतीय जनता पक्ष व राष्ट्रवादी काँग्रेस पक्ष एकत्रच निवडणूक लढविण्यावर भर देण्यात येणार असून राष्ट्रवादी काँग्रेस पक्षाला 50% जागा मिळाव्यात अशी अपेक्षा शेवटी श्रीमंत शिवरूपराजे खर्डेकर यांनी व्यक्त केली आहे.