डॉ. प्रसाद जोशी जीवनगौरव पुरस्काराने सन्मानित

फलटण प्रतिनिधी - 

फलटण शहरात समर्पित, सहानुभूतीपूर्ण आणि अत्याधुनिक ऑर्थोपेडिक सेवा देणारे प्रसिद्ध अस्थिरोगतज्ज्ञ डॉ. प्रसाद जोशी यांना पुणे येथे प्रतिष्ठित ‘जीवनगौरव पुरस्कार’ प्रदान करण्यात आला.

ग्रीन सोल्युशन्स प्रा. लि. यांच्या १४ व्या वर्धापनदिनानिमित्त २३ मे २०२६ रोजी द ऑर्किड हॉटेल येथे आयोजित भव्य सोहळ्यात हा सन्मान प्रदान करण्यात आला.

हा पुरस्कार प्रसिद्ध अभिनेते मकरंद अनासपुरे तसेच लोकमत, पुण्याचे मुख्य संपादक संजय आवटे यांच्या हस्ते प्रदान करण्यात आला. या सन्मानामुळे फलटणमधील गुणवत्तापूर्ण व परवडणाऱ्या ऑर्थोपेडिक सेवेला राज्यस्तरावर मिळालेली दखल अधोरेखित झाली आहे.

ग्रीन सोल्युशन्स प्रा. लि. ही संस्था गेल्या १४ वर्षांपासून पर्यावरणीय परिसंस्था व्यवस्थापन क्षेत्रात विविध पथदर्शी प्रकल्प राबवत असून, संस्थेने भारताचे नॉर्वेमध्ये प्रतिनिधित्व करत उल्लेखनीय कार्य केले आहे. संस्थेचे सागर अहिवळे आणि आरती भोसले अहिवळे यांच्या कार्याचेही यावेळी विशेष कौतुक करण्यात आले.

पुरस्कार स्वीकारताना डॉ. जोशी यांनी ग्रीन सोल्युशन्स प्रा. लि. तसेच सागर अहिवळे आणि आरती भोसले अहिवळे यांचे मनःपूर्वक आभार मानले. हा सन्मान समाजाच्या आरोग्यसेवेसाठी अधिक जोमाने कार्य करण्याची प्रेरणा देणारा असल्याची भावना त्यांनी व्यक्त केली.