आपली फलटण मॅरेथॉन २०२४ - २५ : रविवार दि. ५ जानेवारी २०२५ रोजी

फलटण | धैर्य टाईम्स |

जोशी हॉस्पिटल प्रा. लि., फलटण आणि रोबोटिक्स सेंटर, फलटण यांच्या माध्यमातून प्रतिवर्षीप्रमाणे यावर्षीही आपली फलटण मॅरेथॉनचे आयोजन दि. ५ जानेवारी २०२५ रोजी करण्यात येत असून नाव नोंदणी करुन सहभागी होण्याचे आवाहन डॉ. प्रसाद जोशी व डॉ. सौ. प्राची जोशी यांनी केले आहे.

गेली ७ वर्षे प्रतिवर्षी आपली फलटण मॅरेथॉनचे आयोजन करण्यात येत असून प्रत्येकवर्षी लोकांचा उत्साह वाढतच असल्याचे निदर्शनास आणून देत लोकांना व्यायामाची सवय लागावी, सगळ्यांचे आरोग्य उत्तम रहावे या शुद्ध हेतूनेच आपण, ही मॅरेथॉन सुरु केली आहे. त्यामध्ये विविध वयोगटातील स्त्री - पुरुष, तरुणांसह लोकांचा वाढता सहभाग समाधान देणारा असल्याचे डॉ. प्रसाद जोशी यांनी आवर्जून सांगितले.

 आपली फलटण मॅरेथॉनचे बक्षीस वितरण आणि उपस्थितांना मार्गदर्शन असा दुहेरी उद्देश ठेवून प्रत्येक वर्षी विविध क्षेत्रातील मान्यवरांना आतापर्यंत निमंत्रित करण्यात आले, त्यामध्ये डॉ. शरद हर्डीकर, स्वर्गीय सिंधुताई सपकाळ, आयपीएस विश्वासराव नांगरे पाटील, खा. अमोल कोल्हे, डॉ. प्रकाश बाबा आमटे व सौ. मंदाकिनी आमटे, ज्येष्ठ कीर्तनकार चारुदत्त आफळे, आयपीएस कृष्णप्रकाश वगैरे मान्यवरांनी या उपक्रमात सहभागी होऊन आपल्याला मार्गदर्शन व बक्षीस वितरण केले असल्याचे डॉ. प्रसाद जोशी यांनी निदर्शनास आणून दिले आहे. 

यावर्षी नाटककार, अभिनेता, दिग्दर्शक, चित्रपट निर्माता, बिग बॉस फेम आणि सेलिब्रिटी महेश मांजरेकर यांना उपस्थित श्रोते, मॅरेथॉनमध्ये सहभागी विविध वयोगटातील तरुण वर्गासह नागरिक स्त्री - पुरुष यांना मार्गदर्शन आणि विजेत्यांना बक्षीस वितरण करण्यासाठी निमंत्रित करण्यात आल्याचे डॉ. प्रसाद जोशी यांनी सांगितले.

 रविवार दि. ५ जानेवारी २०२५ रोजी सकाळी ६ वाजता सजाई गार्डन कार्यालय, विमानतळ, फलटण येथून सुरु होणाऱ्या आपली फलटण मॅरेथॉन २०२४ - २५ चा शुभारंभ महेश मांजरेकर व अन्य उपस्थित मान्यवरांच्या हस्ते होणार आहे.

 आपली फलटण मॅरेथॉन मध्ये एकूण ३ विभागातील सहभागी स्पर्धकांपैकी पुरुष व महिला असे प्रत्येकी पाहिले ३ क्रमांकांना मान्यवरांच्या हस्ते बक्षिसे दिली जाणार आहेत. एकूण १८ बक्षिसे देण्यात येणार आहेत. त्यामध्ये पहिले बक्षीस १० हजार रुपये, दुसरे बक्षीस ७ हजार रुपये, तिसरे बक्षीस ५ हजार रुपये असल्याचे डॉ. प्रसाद जोशी यांनी सांगितले.

   मॅरेथॉन पूर्ण करणाऱ्यांना आकर्षक फिनिशर मेडल तसेच मॅरेथॉन मध्ये सहभागी रनर्सना प्रत्येकी एक मॅरेथॉन किट दिले जाणार आहे, ज्या मध्ये टाईम चीप बिब, टी शर्ट, एनर्जी बार, टोपी आणि एक उत्तम भेट वस्तू असणार आहे.

  आपली फलटण मॅरेथॉन २०२४ - २५ मध्ये आपला सहभाग नोंदवा आणि तुमच्या आयुष्याचा निरोगी आणि आनंदी प्रवास सुरु करा असे आवाहन डॉ. प्रसाद जोशी व डॉ. सौ. प्राची जोशी यांनी केले आहे.

  नाव नोंदणीसाठी दि. २० डिसेंबर २०२४ पर्यंत प्रत्येकी ७५० रुपये भरुन www.joshihospitalpvtltd.com या वेबसाईट वर करावी असे सुचविण्यात आले आहे.