प्रभाग ११ मध्ये भाजपच्या विजयी उमेदवार सौ. प्रियदर्शनी रणजितसिंह भोसले व संदीप चोरमले यांनी मतदारांच्या भेटी घेऊन मानले आभार

फलटण | प्रतिनिधी

फलटण नगर परिषदेच्या नुकत्याच पार पडलेल्या सार्वत्रिक निवडणुकीत प्रभाग क्रमांक ११ मधून भारतीय जनता पार्टीच्या सौ. प्रियदर्शनी रणजितसिंह भोसले व संदीप चोरमले यांनी दणदणीत विजय मिळवला. या विजयाबद्दल कृतज्ञता व्यक्त करण्यासाठी दोन्ही विजयी उमेदवारांनी आपल्या कार्यकर्त्यांसह प्रभागात घरोघरी भेटी देत पेढे वाटून मतदारांचे मनापासून आभार मानले.

फलटण नगरपालिकेच्या या निवडणुकीत माजी खासदार रणजितसिंह नाईक निंबाळकर तसेच आमदार सचिन कांबळे पाटील, जेष्ठ नेते प्रल्हादराव साळुंखे पाटील, शिवरूराजे खर्डेकर, माजी नगराध्यक्ष दिलीपसिंह भोसले यांच्या मार्गदर्शनाखाली भारतीय जनता पार्टी व राष्ट्रवादी काँग्रेस पार्टी (अजितदादा पवार गट) यांनी एकत्र येत बहुमत सिद्ध केले आहे. यामुळे फलटणच्या राजकारणात नवे समीकरण निर्माण झाले असून विकासाभिमुख कारभाराला चालना मिळणार असल्याचा विश्वास कार्यकर्त्यांमध्ये व्यक्त होत आहे.

प्रभाग क्रमांक ११ मध्ये नगराध्यक्ष समशेरबहाद्दर नाईक निंबाळकर, नगरसेवक सौ. प्रियदर्शनी भोसले व नगरसेवक संदीप चोरमले यांना मतदारांनी भरघोस बहुमत देत विजयी केले. यावेळी विजयी उमेदवारांनी “मतदारांनी दाखवलेल्या विश्वासाला न्याय देत प्रभागाच्या सर्वांगीण विकासासाठी कटिबद्ध राहू,” अशी ग्वाही दिली.