फलटणच्या काजल ऋतुराज भोईटे यांना 'दादासाहेब फाळके इंटरनॅशनल कॉन्टेंट क्रिएटर अवॉर्ड 2026'; फलटणच्या शिरपेचात मानाचा तुरा

फलटण प्रतिनिधी :

फलटण येथील काजल ऋतुराज भोईटे यांना 'दादासाहेब फाळके इंटरनॅशनल कॉन्टेंट क्रिएटर अवॉर्ड 2026' ने सन्मानित करण्यात आले. मुंबईतील हॉटेल सहारा स्टार येथे आयोजित भव्य पुरस्कार सोहळ्यात अभिनेत्री उल्का गुप्ता यांच्या हस्ते त्यांना हा मानाचा पुरस्कार प्रदान करण्यात आला.

या कार्यक्रमाला दीपिटा समूहाचे चेअरमन अखिलेश सिंग, पद्मश्री काळुराम बमानिया, आर्ट मीडिया ॲडव्हर्टायझिंगचे प्रमुख सुनील सेठी तसेच तारक मेहता का उल्टा चष्मा मालिकेतील कलाकार उपस्थित होते.

दादासाहेब फाळके यांच्या नावाने दिला जाणारा हा पुरस्कार मनोरंजन आणि सर्जनशील क्षेत्रातील उल्लेखनीय कार्याचा गौरव मानला जातो. काजल ऋतुराज भोईटे यांना हा सन्मान मिळाल्याने फलटणच्या नावात आणखी भर पडली असून शहरासाठी हा अभिमानाचा क्षण मानला जात आहे.

काजल भोईटे या फलटण नगरीचे माजी नगराध्यक्ष स्व. नंदूशेठ भोईटे यांच्या स्नुषा असून उद्योजक ऋतुराज भोईटे यांच्या पत्नी आहेत. सामाजिक बांधिलकी, उद्योजकता आणि दानशूरपणासाठी ओळख असलेल्या भोईटे कुटुंबातील सुनेला हा प्रतिष्ठेचा पुरस्कार मिळाल्याने फलटणसह विविध स्तरांतून त्यांच्यावर अभिनंदनाचा वर्षाव होत आहे.

या यशामुळे फलटणच्या सांस्कृतिक आणि सामाजिक क्षेत्राच्या नावलौकिकात भर पडली असून काजल ऋतुराज भोईटे यांच्या पुढील वाटचालीसाठी शुभेच्छांचा वर्षाव होत आहे.