फलटण नजीक डी-मार्ट बांधकामावर वाद : परवानग्यांविना काम सुरू असल्याचा आरोप, नागरिकांमध्ये संताप

फलटण प्रतिनिधी –

फलटण तालुक्यातील फरांदवाडी ग्रामपंचायत हद्दीत, आळंदी–पंढरपूर मार्गालगत वडजल गावाजवळ सुरू असलेल्या डी-मार्टच्या बांधकामावरून वाद निर्माण झाला आहे. स्थानिक परवानग्या न घेता तसेच शासकीय मालमत्तेचे नुकसान करून काम सुरू असल्याचा आरोप नागरिक व शेतकरी करीत असून, प्रशासनाच्या भूमिकेबाबत प्रश्नचिन्ह उपस्थित होत आहे.

माहितीनुसार, संबंधित ठिकाणी मोठ्या प्रमाणात बांधकाम सुरू असून, ग्रामपंचायत अथवा स्थानिक प्रशासनाची आवश्यक परवानगी घेतली नसल्याची चर्चा परिसरात सुरू आहे. तसेच, शेतकऱ्यांच्या शेतात ये-जा करण्यासाठी आमदार निधीतून करण्यात आलेल्या रस्त्याचे कामादरम्यान मोठे नुकसान झाल्याचा आरोप करण्यात येत आहे.

या संदर्भात ग्रामस्थांनी तक्रारी केल्याचे सांगितले जात असले तरी, बांधकामाचे काम सुरूच असल्याने नागरिकांमध्ये नाराजी व्यक्त होत आहे. शासकीय मालमत्तेचे नुकसान होऊनही अद्याप कोणतीही ठोस कारवाई झालेली नाही. तसेच, नुकसानभरपाईबाबतही संबंधितांकडून कोणतीही भूमिका स्पष्ट करण्यात आलेली नसल्याचे स्थानिकांचे म्हणणे आहे.

यामुळे “मोठ्या धन दांडग्यांना कायद्याचे बंधन नाही का?” असा सवाल सर्वसामान्य नागरिकांकडून उपस्थित केला जात आहे. परवानग्या, जमीन वापर, तसेच शासकीय रस्त्याच्या नुकसानीबाबत प्रशासनाने तत्काळ चौकशी करून वस्तुस्थिती स्पष्ट करावी आणि आवश्यक असल्यास कडक कारवाई करावी, अशी मागणी ग्रामस्थ व शेतकऱ्यांकडून होत आहे.

दरम्यान, या प्रकरणाबाबत संबंधित बांधकाम प्रकल्प व्यवस्थापन, ग्रामपंचायत तसेच महसूल विभाग यांची अधिकृत भूमिका अद्याप स्पष्ट झालेली नाही. प्रशासनाच्या पुढील कारवाईकडे तालुक्याचे लक्ष लागले आहे.