घरगुती सोलर योजनेला नागरिकांचा वाढता प्रतिसाद; वीज बिलातून दिलासा मिळण्याची संधी

फलटण : केंद्र शासनाच्या प्रधानमंत्री सूर्यघर योजनेअंतर्गत घरगुती सोलर प्रणाली बसविण्यासाठी नागरिकांना मोठ्या प्रमाणावर अनुदान दिले जात असून, महावितरणमार्फत या योजनेची माहिती नागरिकांपर्यंत पोहोचवली जात आहे. वाढत्या वीज बिलामुळे त्रस्त असलेल्या ग्राहकांसाठी ही योजना दिलासादायक ठरत आहे. या योजनेअंतर्गत घराच्या छतावर सोलर पॅनल बसवून दिवसा निर्माण होणारी वीज घरगुती वापरासाठी वापरता येणार आहे.

महावितरणकडून देण्यात आलेल्या माहितीनुसार, १ किलोवॅट घरगुती सोलर योजनेसाठी विविध प्रवर्गातील ग्राहकांना अनुदान व सवलती देण्यात येत आहेत. बीपीएल ग्राहकांना सुमारे २,५०० रुपये, एससी/एसटी ग्राहकांना ५,००० रुपये तर इतर 1 किलोवॅट व 100 युनिट च्या आत वापर असलेल्या ग्राहकांना १०,००० रुपये भरले की योजने मध्ये लाभ दिला जाणार आहे. याशिवाय केंद्र शासनाकडून ३० हजार रुपयांपर्यंत अनुदान उपलब्ध असल्याची माहिती देण्यात आली आहे.

या योजनेसाठी ग्राहकांनी लाईट बिल, आधार कार्ड, नोंदणीकृत मोबाईल क्रमांक व ई-मेल आयडी आदी कागदपत्रांसह ऑनलाइन अर्ज करावा लागणार आहे. अर्जासाठी प्रधानमंत्री सूर्यघर पोर्टलवर नोंदणी करणे आवश्यक असून, नागरिकांनी अधिक माहितीसाठी जवळच्या महावितरण कार्यालयाशी संपर्क साधावा, असे आवाहन करण्यात आले आहे.

दरम्यान, वाढते वीज दर, वारंवार होणारे लोडशेडिंग आणि पर्यावरणपूरक ऊर्जेची गरज लक्षात घेता अनेक नागरिक या योजनेकडे आकर्षित होत असल्याचे चित्र दिसत आहे.