अनैसर्गिक कृत्य करण्याच्या उद्देशाने 5 वर्षांच्या अल्पवयीन मुलाचा खून

सातारा : म्हसवे, ता. सातारा येथील एका घरात अनैसर्गिक कृत्य करण्याच्या उद्देशाने 5 वर्षांच्या अल्पवयीन मुलाचा खून झाल्याची घटना घडली. या गुन्ह्याची उकल स्थानिक गुन्हे शाखेच्या पथकाने दोन तासात केली असून या गुन्ह्यातील एका अल्पवयीन मुलास ताब्यात घेण्यात आले आहे.
याबाबत पोलिसांनी दिलेली माहिती अशी, दि.7 रोजी सायंकाळी 6.00 ते 7.30 वा.च्या सुमारास म्हसवे, ता.जि.सातारा या गावातील एका घरामध्ये 5 वर्षांच्या अल्पवयीन मुलाचा कोणीतरी अज्ञाताने अज्ञात कारणाकरीता खुन केला म्हणून फिर्यादी यांनी दिलेल्या फिर्यादीवरुन सातारा तालूका पोलीस ठाण्यात गुन्हा नोंद करण्यात आलेला आहे.
या गुन्ह्याचे गांभीर्य लक्षात घेवून पोलीस अधीक्षक अजय कुमार बन्सल, अपर पोलीस अधीक्षक अजित बोर्‍हाडे, अपर पोलीस अधीक्षक, सातारा, उपविभागीय पोलीस अधिकारी गणेश किंद्रे, स्थानिक गुन्हे शाखेचे पोलीस निरीक्षक किशोर धुमाळ यांनी गुन्ह्याच्या घटनास्थळी भेट दिली. 5 वर्षाच्या मुलाचा कोणीतरी अज्ञात इसमाने खून केला, ही बाब अतिशय गंभीर स्वरुपाची असल्याने पोलीस अधीक्षक अजय कुमार बन्सल, अपर पोलीस अधीक्षक अजित बोर्‍हाडे यांनी स्थानिक गुन्हे शाखेचे पोलीस निरीक्षक किशोर धुमाळ यांना या गुन्ह्यातील अज्ञात आरोपीचा शोध घेवून गुन्हा उघडकीस आणण्याच्या सुचना दिल्या.
किशोर धुमाळ यांनी सहायक पोलीस निरीक्षक आनंदसिंग साबळे व पोलीस उपनिरीक्षक गणेश वाघ यांच्या अधिपत्याखाली एक विशेष पथक तयार केले. या पथकाने घटनास्थळाची पाहणी केली. त्यानंतर घटनास्थळाच्या आजूबाजूच्या परिसरातील नागरिकांकडे गुन्ह्याच्या अनुषंगाने सखोल विचारपूस करीत असताना स्थानिक गुन्हे शाखेचे पो.ना.गणेश कापरे, मोहन पवार, पो.कॉ.रोहित निकम, वैभव सावंत यांना गोपनिय माहिती प्राप्त झाली की, घटनास्थळ असलेल्या घराशेजारील एका विधी संघर्षग्रस्त बालकाने मयत अल्पवयीन बालकावर अनैसर्गिक अत्याचार करण्याचे उद्देशाने घटनास्थळावर घेवून जावून त्याचा खून केला आहे. अशी माहिती प्राप्त झाल्यानंतर गणेश वाघ व त्यांच्या तपास पथकाने गुन्ह्यातील विधी संघर्षग्रस्त बालकास तात्काळ ताब्यात घेवून त्याच्याकडे कौशल्यपुर्ण पद्धतीचा वापर करुन विचारपूस केली असता त्याने त्या बालकाचा खून अनैसर्गिक अत्याचार करण्याच्या उद्देशाने केला असल्याचे सांगितले. अशारितीने 5 वर्षाच्या अल्पवयीन मुलाच्या खुनाचा गुन्हा 2 तासाच्या आत स्थानिक गुन्हे शाखेने उघड केला आहे.
ही कारवाई पोलीस अधीक्षक अजय कुमार बन्सल, अपर पोलीस अधीक्षक अजित बोर्‍हाडे, अपर पोलीस अधीक्षक, सातारा, उपविभागीय पोलीस अधिकारी गणेश किंद्रे यांच्या सूचनांप्रमाणे व स्थानिक गुन्हे शाखेचे पोलीस निरीक्षक किशोर धुमाळ यांच्या मार्गदर्शनाखाली सहायक पोलीस निरीक्षक आनंदससिंग साबळे, पोलीस उपनिरीक्षक गणेश वाघ, पो.ना. मुनीर मुल्ला, गणेश कापरे, मोहन पवार, पो.कॉ. रोहित निकम, वैभव सावंत, सातारा तालुका पोलीस ठाण्याचे सहायक पोलीस निरीक्षक अभिजीत चौधरी, पोलीस उपनिरीक्षक ज्ञानेश्वर दळवी, अमित पाटील, पो.हवा.दादा परिहार, पो.ना.नितीराज थोरात, मालोजी चव्हाण, सतिश पवार यांनी केली आहे.

मुलांच्या हातात मोबाईल देताय सावधान!
या खुनाच्या घटनेत समोर आलेले कारण पाहता छोट्या मुलाबरोबर अनैसर्गिक कृत्य करण्याचा भावना निर्माण होण्यासाठी मुलांच्या हातात गेलेले मोबाईल कारणीभूत असल्याचे समोर येत आहे. मुलांना मोबाईल देताना ते काय पहात आहेत, नेमके मोबाईलवर काय करत आहेत याकडे आता पालकांनी गांभीर्याने लक्ष दिले पाहिजे. कारण अल्पवयात ही मुले पॉर्न पहात असल्याने त्यांच्या मनावर त्याचे विपरित परिणाम होत आहेत. त्यातूनच मग अशा प्रकारचे कृत्य करण्याची भावना त्यांच्यात अल्पवयातच निर्माण होते. त्यातून मग विकृती निर्माण होवून अशा प्रकारच्या घटनांना सामोरे जावे लागत असल्याचे समोर येत आहे.