मेरा भारत महान शब्दांचा अक्षर गणेश

कराड येथील प्रथितयश डॉक्टर व सामाजिक कार्यकर्ते डाॅ.राजेंद्र कंटक यांनी "मेरा भारत महान" या शब्दांमधून अक्षर गणेश रेखाटण्याचा  रेकॉर्ड ब्रेक विक्रम केला आहे.
भारताच्या स्वातंत्र्याचे अमृत महोत्सवी वर्ष सगळीकडे मोठ्या उत्साहात आणि विविध कार्यक्रमांनी साजरे होत आहे. त्याचेच औचित्य साधून डॉ. राजेंद्र कंटक यांनी या विक्रमाची किमया साधली आहे. 
यापूर्वी त्यांनी अशाच प्रकारे बहुढंगी विक्रमांची नोंद केली आहे. त्याची दखल रेकॉर्ड बुकमध्ये झाली आहे. सगळीकडे स्वातंत्र्य दिनानिमित्त उपक्रम राबविले जात आहेत. त्याचवेळी आपणही आपल्या छंदातून काहीतरी करावे या संकल्पनेतून डॉ. राजेंद्र कंटक यांनी दि. 15 ऑगस्ट 2022 रोजी दुपारी 02:30 ते 03:45 या 75 मिनिटांमध्ये "मेरा भारत महान" या शब्दांमधून कॅलिग्राफी मध्ये 75 अक्षर गणेश रेखाटले आहेत. सदर रेकॉर्ड करताना त्यांनी 55 मिनिटात 75 गणपती रेखाटले व वीस मिनिटात गणपतीला डिझाईन केले. यासाठी त्यांनी ७.५×५ इंच पेपर वापरला आहे. या उपक्रमाची नोंद रेकॉर्ड बुक मध्ये होणार असून डॉ.कंटक यांचे हे दहावे रेकॉर्ड असेल.
आपल्या अंगभूत कलागुणांची अभिव्यक्ती करण्याचा हा त्यांचा प्रयत्न अनेकांना प्रेरणादायी ठरणार आहे. आपला वैद्यकीय व्यवसाय सांभाळून त्यांनी जोपासलेली ही कला निश्चितच कौतुकास्पद म्हणावी लागेल. या निमित्ताने पुन्हा एकदा कराड शहराच्या नावलौकिकात भर पडली आहे. 
त्यांच्या या यशस्वी उपक्रमाबद्दल त्यांचे विविध मान्यवरांनी अभिनंदन केले आहे.