साताऱ्यातील शर्मा दांपत्यांचा संघर्ष प्रेरणादायी : नंदकुमार फडके

सातारा : वयाच्या पाचव्या वर्षी अपघाताने कोपरापासून दोन्ही हात गमावलेल्या दिनेश शर्मा यांनी स्वतःच्या अपंगत्वावर मात करत शैक्षणिक, व्यावसायिक व वैवाहिक जीवनात उल्लेखनीय यश संपादन केले. या वाटचालीत त्यांची पत्नी नितू शर्मा यांनी दिलेली साथ कौतुकास्पद असून या दांपत्यांचा संघर्ष व त्यांनी प्रतिकूल परिस्थितीवर मात करत मिळवलेले यश प्रेरणादायी असल्याचे गौरवोद्गार  साताऱ्यातील सुप्रसिद्ध बांधकाम व्यावसायिक नंदकुमार फडके यांनी काढले.
जागतिक दिव्यांग दिनाचे औचित्य साधून सातारा येथील कर्ण फाऊंडेशन या सामाजिक संस्थेने सातारा शहरातील दिनेश शर्मा या अवलियाला हेरून व त्यांच्या सुविद्य पत्नी नितू शर्मा यांचा शाल-श्रीफळ, सन्मान चिन्ह, पुष्पगुच्छ व मिठाई देऊन गौरव करण्यात आला. याप्रसंगी ते बोलत होते.
नंदकुमार फडके म्हणाले, दिनेश शर्मा यांना लहान वयामध्ये अपघाती अपंगत्व आले. पण त्यांनी खचून न जाता आयुष्यात केलेली प्रगती अत्यंत उल्लेखनीय व प्रेरणादायी आहे. प्रौढ वयात त्यांनी जिद्द, चिकाटी व मेहनतीच्या जोरावर केलेला व्यवसायातील उत्कर्षाचा आलेख हा आश्‍चर्यकारक, निरंतर, अभिमानास्पद व इतरांना नवी दिशा देणारा आहे.  
यावेळी आर. पी. आय. चे जिल्हाध्यक्ष  युवराज कांबळे म्हणाले, त्यांच्या यशात त्यांच्या पत्नीचाही  सिंहाचा वाटा आहे. तिने संपूर्ण आयुष्यात व्यवसायात दिलेली साथ ही अतिशय मोलाची आहे.
कर्ण फाऊंडेशनचे अध्यक्ष शेखर कोल्हापुरे म्हणाले की, जागतिक दिव्यांग दिनाचे औचित्य साधून दरवर्षी कर्ण फाऊंडेशन ही संस्था अनेक उपक्रम राबवत असते. दिनेश शर्मा हे दिव्यांग असून सुद्धा त्यांची सुरू असलेली प्रगतीची घोडदौड यापुढेही अखंडपणे चालू रहावी हीच सर्वस्वी इच्छा आहे.