नाईक निंबाळकर देवस्थान ट्रस्ट च्या वतीने श्रीमंत संजीवराजे यांनी केले माऊलींचे स्वागत

फलटण : 

विठ्ठल- वारकरी प्रेमाचे आर्त प्रकट करणारे दिंड्यांमधून गायले जाणारे अभंग...डौलाने फडकणाऱ्या पताका...रथाला डोळ्यांचे पारणे फेडणारी केलेली आकर्षक फुलांची सजावट, मुखी ‘माऊली-माऊली’ नामाचा अखंड जयघोष अशा भक्तिमय वातावरणात श्री संत शिरोमणी ज्ञानेश्वर महाराजांच्या पालखी सोहळ्याने आज फलटण शहरात प्रवेश केला.

माऊलींचा हा सोहळा शहरात दाखल झाल्यानंतर तो मलठण, सदगुरु हरीबुवा मंदिर, पाचबत्ती चौक या मार्गे ऐतिहासिक राम मंदिराजवळ आला. यावेळी नाईक निंबाळकर देवस्थान ट्रस्ट च्या वतीने माजी जि.प.अध्यक्ष संजीवराजे नाईक निंबाळकर, श्रीमंत सौ. शिवांजली राजे नाईक निंबाळकर, श्रीमंत महेंद्रसिंह माहूरकर, श्रीमंत सत्यजित राजेनाईक निंबाळकर यांनी स्वागत केले. यावेळी सौ संध्याराणी माहूरकर, सौ लक्ष्मी देवी करले, भरत मर्चंट,आदी मान्यवर यावेळी उपस्थित होते.

 फलटण शहरातील व तालुक्यातील शेकडो भाविकांनी यावेळी माऊलींचे दर्शन घेतले. आज सकाळपासूनच फलटण शहरात वारकरी मोठ्या संख्येने दाखल होत होते. 

 फलटण शहरातील विविध सामाजिक संस्था, फलटण नगर परिषद, शिवसेना उद्धव बाळासाहेब ठाकरे, यांच्यासह अनेक मंडळांनी वारकऱ्यांना चहा बिस्किट नाश्ता यास जेवणाची विविध ठिकाणी सोय केली होती. अधून मधून पावसाच्या सरी बरसत असल्या तरीही माऊलीचा अखंड जयघोष सुरूच होता. आज एक दिवसाच्या फलटणच्या मुक्कामानंतर पालखी सोहळा उद्या सकाळी सातारा जिल्ह्यातील शेवटचा मुक्काम बरड या ठिकाणी मार्गस्थ होईल.