जबरी चोरी प्रकरणी तडीपार गुंडास अटक

सातारा : जबरी चोरीप्रकरणी तडीपार गुंडास अटक करण्यात शाहूपुरी पोलिस ठाण्याच्या गुन्हे प्रकटीकरण शाखेच्या पथकाला यश आले. दत्तात्रय उत्‍तम घाडगे, वय ३०, रा. शिवशंभो कॉलनी, दौलत नगर, सातारा असे त्याचे नाव असून त्याला येथील उपविभागीय दंडाधिकारी यांनी मार्च २०२१ पासून सातारा जिल्ह्यातून दोन वर्ष करता हद्दपार केले होते.
याबाबत शाहूपुरी पोलिसांनी दिलेली माहिती अशी, दि. १६ ऑक्टोंबर २०२१ रोजी दुपारच्या सुमारास सातारा बस स्थानक समोरील एका चायनीज सेंटर वर एक तडीपार गुंड चायनीज खाण्यासाठी आला होता. त्यावेळी चायनीज सेंटरचे मालक हे कॅश काउंटर वर बसून पैसे मोजत असताना त्याने त्यांच्याजवळ जाऊन १२०० रुपये जबरदस्तीने हिसकावून घेतले. त्याला सेंटर मालकाने प्रतिकार केला असता त्या गुंडाने चाकू काढून फिरवल्याने फिर्यादीने घाबरुन त्यास सोडून दिले. त्यावेळी हा गुंड पैसे घेवून तेथुन निघुन गेला. याबाबत शहर पोलिस ठाण्यात तक्रार दाखल करण्यात आली होती. संबंधित गुंडाला अटक करण्याच्या सूचना पोलीस निरीक्षक संजय पतंगे यांनी गुन्हे प्रकटीकरण शाखेच्या पथकाला केल्या होत्या. शाहूपुरी पोलिसांनी संबंधित गुंड दत्तात्रय उत्तम घाडगे (वय 30, रा. शिवशंभो कॉलनी दौलतनगर, सातारा) याला अटक करून चोरी केलेली रोख रक्कम व चाकू हस्तगत करण्यात आला आहे.
या कारवाईत सहाय्यक पोलीस निरीक्षक अभिजीत यादव, गुन्हे प्रकटीकरण शाखेचे पोलीस उपनिरीक्षक नानासाहेब कदम, पोलीस हेडकॉन्स्टेबल हसन तडवी, पोलीस नाईक लैलेश फडतरे, अमित माने, स्वप्नील कुंभार, पोलीस कॉन्स्टेबल मोहन पवार, पंकज मोहिते, ओंकार यादव यांनी सहभाग घेतला.