बैलगाडा शर्यतीला प्रचंड प्रतिसाद : महिला प्रेक्षकांसाठी विशेष गॅलरी : सरपंच सागर अभंग यांची माहिती

फलटण प्रतिनिधी - माढा लोकसभा मतदारसंघाचे लोकप्रिय पाणीदार खासदार रणजितसिंह नाईक निंबाळकर यांच्या वाढदिवसानिमित्त भव्य बैलगाडा शर्यती साई मंदिर शेजारी जाधववाडी, फलटण येथे भरविण्यात आल्या असून या बैलगाडा शर्यतीला प्रचंड प्रतिसाद मिळत आहे. महाराष्ट्रासह इतर राज्यातून बैलगाडा येणार आहेत. बैलगाडा शर्यतीचे आकर्षण पाहता या स्पर्धा पाहण्यासाठी महिला प्रेक्षकांना विशेष गॅलरीचे आयोजन केले असल्याची माहिती मुख्य आयोजक विडणीचे (ता. फलटण) लोकनियुक्त सरपंच सागर अभंग यांनी दिली.

या भव्य बैलगाडा शर्यती सोमवार दि.11 मार्च रोजी सकाळी 8 ते सायंकाळी 5 या वेळात होणार असून स्पर्धेतील अंतिम सामन्यानंतर लगेच विविध मान्यवरांच्या उपस्थित बक्षीस समारंभ होणार आहे. यावेळी खासदार छत्रपतीउदयनराजे भोसले, खासदार रणजितसिंह नाईक निंबाळकर,आमदार जयकुमार गोरे, आमदार शहाजीबापू पाटील, आमदार राम सातपुते, विरोधी पक्ष नेते फ.न.प., फलटण समशेरसिंह नाईक निंबाळकर,फलटण कोरेगाव विधानसभा प्रमुख सचिन कांबळे पाटील, स्वराज पतसंस्थेचे चेअरमन अमरसिंह नाईक निंबाळकर आदी मान्यवर यावेळी उपस्थित राहणार आहेत.

https://dhairyatimess.com/post/96224   फलटणला गौतमी पाटील

निकाल रेषा,अत्यंत पारदर्शक व ड्रोन तसेच पट्टी व इतर सर्व गोष्टींचा समावेश करण्यात आला असून ही स्पर्धा पारदर्शक व स्वच्छ वातावरणात पार पडणार आहेत. या स्पर्धेत सहभागी होणाऱ्याना नाममात्र एक हजार पाचशे रुपये प्रवेश फी आकारली जाणार असून ती ऑनलाईन व ऑफलाईन भरण्याची सुविधा उपलब्ध आहे.

या स्पर्धेतील पाहिले बक्षिस पाच लाख रुपये, दुसरे बक्षिस तीन लाख रुपये, तिसरे बक्षिस दोन लाख रुपये,चौथे बक्षिस एक लाख रुपये,पाचवे बक्षिस पंचाहत्तर हजार रुपये, सहावे बक्षिस पन्नास हजार रुपये व सातवे बक्षिस पंचवीस हजार रुपये रोख रक्कम स्वरूपात मिळणार आहे.

स्पर्धेतील वैशिष्ट्ये :

• गटातील प्रथम येणाऱ्यांना आकर्षक अशी चांदीची गदा
• स्पर्धेत सहभागी असणाऱ्या पशूंना चारा व पाणी मोफत
• बैलगाडा शर्यत स्पर्धा ही अत्यंत पारदर्शक
• विविध ठिकाणी ड्रोन कॅमेरे
• पूर्ण स्पर्धा यूट्यूब वरती लाईव्ह प्रक्षेपण
• स्पर्धेत नामांकित झेंडा पंच
• थेट समालोचन
• महिलांसाठी विशेष प्रेक्षक गॅलरी
• 250 पेक्षा जास्त एलईडी लाइट्स.
• एलईडी स्क्रीन
• ॲम्बुलन्स सुविधा